ప్రత్యేక హెలికాప్టర్‌లో మేడారంనకు మంత్రులు.. ఏర్పాట్ల పరిశీలన

సమ్మక్క సారలమ్మ జాతర పనులను పర్యవేక్షించేందుకు ప్రత్యేక హెలికాప్టర్‌లో మంత్రులు సత్యవతి రాథోడ్, ఎర్రబెల్లి దయాకర్ రావు, వేముల ప్రశాంత్ రెడ్డి, ఎంపీ మాలోత్ కవిత తదితరులు మేడారం వెళ్లారు. శనివారం ఉదయం బేగంపేట ఎయిర్ పోర్టు నుంచి వారు వరంగల్ చేరుకున్నారు. అక్కడి నుంచి రోడ్డు పనులు, జాతర ఏర్పాట్లు చూడడం కోసం రోడ్డు మార్గంలో మేడారం చేరుకున్నారు.

ఈ నెల 5 నుంచి 8వ తేదీ వరకూ మేడారం జాతర నేపథ్యంలో ముఖ్యమంత్రి కేసీఆర్ రూ.75 కోట్లను అక్కడి భక్తులకు మౌలిక సదుపాయాల కోసం కేటాయించారు. ఈ ఏర్పాట్ల పనులను పరిశీలించేందుకు మంత్రులు వెళ్లారు. భక్తుల సౌకర్యార్థం వసతులు ఏ విధంగా ఉన్నాయనే విషయాలు పరిశీలించి, అధికారులతో మంత్రులు సమీక్ష జరపనున్నారు.

ప్రత్యేక బస్సులు..
దేశంలోనే అతిపెద్ద గిరిజన జాతరగా పేరు గడించిన మేడారం జాతరకు పెద్ద ఎత్తున భక్తులు తరలి వస్తుండడంతో టీఎస్ఆర్టీసీ ప్రత్యేక ఏర్పాట్లు చేసింది. నగరంలోని పది ప్రాంతాల నుంచి ఆర్టీసీ ప్రత్యేక బస్సులను నడిపేందుకు సిద్ధమైంది. ఇప్పటికే గత నెల 26న 40 వరకు ఆర్టీసీ ప్రత్యేక బస్సులను ప్రయోగాత్మకంగా నడిపారు. ఈ క్రమంలో ఆదివారం నుంచి ఈ నెల 8 వరకు మరో 500 బస్సు సర్వీసులను నడిపేందుకు ఆర్టీసీ చర్యలు చేపట్టింది. బస్సుల్లో మేడారం సీట్ల బుకింగ్‌ ప్రక్రియను ప్రారంభించిన సందర్భంలో 50 మంది ఒకేసారి బుక్‌ చేసుకుంటే వారికి అనువైన ప్రాంతానికి బస్సును పంపిస్తామని గ్రేటర్‌ ఆర్టీసీ అధికారులు ప్రకటించారు.


తెలంగాణ పర్యటక శాఖ కూడా మేడారం జాతరకు ప్రత్యేక ప్యాకేజీని ప్రకటించింది. హైదరాబాద్- మేడారం- హైదరాబాద్ (వన్ డే ప్యాకేజీ టూర్) ఉదయం 6 గంటలకు యాత్రి నివాస్, సికింద్రాబాద్ నుంచి మొదలు కానుంది. అదే రాత్రి 10.30 హైదరాబాద్ చేరుకుంటారు. మేడారంతోపాటు వేయి స్తంభాల గుడి సందర్శన ఉంటుంది. బస్సు ఛార్జీలు వోల్వో బస్సు అయితే పెద్దలకు రూ.1,500.. పిల్లలకు రూ.1,200 వసూలు చేస్తారు. ఏసీ హైటెక్ కోచ్ బస్సులో పిలలకు రూ.800, పెద్దలకు రూ.వెయ్యి ఛార్జి చేస్తారు.