పెళ్లి కోసం రెండేళ్లు ఆగలేను.. 16 ఏళ్ల బాలిక ఆత్మహత్య

పదో తరగతి చదువుతున్న ఓ బాలిక పెళ్లి కోసం రెండేళ్లు ఆగలేక ఆత్మహత్య చేసుకున్న ఘటన హైదరాబాద్ పాతబస్తీలో చోటు చేసుకుంది. ప్రేమించిన యువకుడితో పెళ్లి జరిపించడానికి రెండేళ్లు ఆగాలంటూ ఆ మైనర్ బాలిక తల్లిదండ్రులు సర్దిచెప్పడమే శాపమైంది. రెండేళ్ల తర్వాత ప్రియుడిని పెళ్లి చేసుకుంటానో, లేదో అనే ఆందోళనతో మనస్తాపం చెంది ఆమె ఉరేసుకుని బలవన్మరణానికి పాల్పడింది.

పాతబస్తీలోని ఫలక్‌నుమా పోలీస్ స్టేషన్‌ పరిధిలోని ఓ బాలిక (16) స్థానిక పాఠశాలలో పదో తరగతి చదువుతోంది. గత కొంతకాలంగా ఆమె ఓ యువకుడిని ప్రేమిస్తోంది. అతడితో తనకు పెళ్లి చేయాలని తల్లిదండ్రులను కోరింది. మైనర్‌ కావడంతో తల్లిదండ్రులు అందుకు నిరాకరించారు. మేజర్‌ అయ్యాక పెళ్లి చేస్తామని నచ్చజెప్పారు.

Must Read: ప్రమాదకర స్థితిలో పీవీ ఎక్స్‌ప్రెస్ వే.. వాహనదారుల్లో భయం

తల్లిదండ్రుల మాటలపై నమ్మకం లేని ఆ బాలిక సెప్టెంబర్ 20న ఓ మధ్యవర్తి ద్వారా స్థానికంగా ఓ ఖాజీని సంప్రదించింది. ఖాజీ కూడా ఆ బాలిక మైనర్‌ అని చెప్పి పెళ్లి చేయడానికి నిరాకరించారు. దీంతో మనస్తాపానికి గురైన బాలిక కఠిన నిర్ణయం తీసుకుంది.

బుధవారం (సెప్టెంబర్ 25) ఇంట్లో ఎవరూ లేని సమయంలో ఆ మైనర్ బాలిక ఉరి వేసుకుని ఆత్మహత్య చేసుకుంది. ఆత్మహత్య చేసుకోవడానికి ముందు ‘సారీ డాడీ.. సారీ మమ్మీ’ అంటూ ఓ లేఖను రాసిపెట్టింది. ఆ బాలిక రాసిపెట్టిన సూసైన్ నోట్‌ను పోలీసులు స్వాధీనం చేసుకున్నారు.

Don't Miss: వేణుమాధవ్ తీరని కోరిక ఇదే..

‘రెండేళ్ల తర్వాత పరిస్థితి ఎలా ఉంటుందో.. నాకు నచ్చిన యువకుడితో పెళ్లి జరిపిస్తారో, లేదో.. అందుకే ఆత్మహత్య చేసుకుంటున్నా. సారీ డాడీ.. సారీ మమ్మీ’ అంటూ మైనర్ బాలిక తాను రాసిన లేఖలో పేర్కొంది. కేసు నమోదు చేసి దర్యాప్తు చేస్తున్నట్లు ఫలక్‌నుమా పోలీసులు తెలిపారు. తెలిసీ తెలియని వయసులో ప్రేమలో పడి.. మైనారిటీ తీరకముందే పెళ్లి కోసం తాపత్రయ పడి బాలిక ఆత్మహత్య చేసుకోవడం చర్చనీయాంశంగా మారింది.