Miss Telangana మరోసారి ఆత్మహత్యాయత్నం.. అసలేమైంది?

ఇన్‌స్టాగ్రామ్ లైవ్‌లో ఆత్మహత్యాయత్నం చేసి పోలీసుల చొరవతో బయటపడిన మిస్ తెలంగాణ విన్నర్ హాసిని మరోమారు బలవన్మరణానికి యత్నించింది. ఆస్పత్రి నుంచి డిశ్చార్జి అయ్యి ఇంటికి వెళ్లిన మరుసటి రోజే ఆమె ఆత్మహత్యాయత్నం చేసినట్లు తెలుస్తోంది. ఏపీలోని కృష్ణా జిల్లా నందిగామ వద్ద ఆమె కాల్వలో దూకి చనిపోయేందుకు యత్నించిందని.. స్థానిక యువకులు ఆమెను కాపాడినట్లు సమాచారం. ఆమెను నందిగామ ప్రభుత్వాస్పత్రికి తరలించి చికిత్స అందిస్తున్నట్లు తెలుస్తోంది. రెండు రోజుల వ్యవధిలోనే ఆమె రెండుసార్లు బలవన్మరణానికి యత్నించడం చర్చనీయాంశమైంది.

కృష్ణా జిల్లాకు చెందిన హాసిని కొన్నేళ్ల కిందట హైదరాబాద్‌‌కి వచ్చింది. మోడలింగ్‌పై ఇష్టంతో కెరీర్‌గా ఎంచుకుంది. 2018 మిస్ తెలంగాణ పోటీల్లో విజయం సాధించి మిస్ తెలంగాణగా ఎంపికైంది. రెండు రోజుల కిందట అనూహ్యంగా ఆమె ఆత్మహత్యాయత్నం చేసింది. నేనిక బతకలేను.. అంటూ ఇన్‌స్టాగ్రామ్ లైవ్ ఆన్‌చేసి ఆమె బలవన్మరణానికి ప్రయత్నించింది. గమనించిన ఆమె ఫ్రెండ్ వెంటనే డయల్ 100కి సమాచారం అందించడంతో పోలీసులు తక్షణం స్పందించి ఆమె ప్రాణాలు కాపాడారు.

అప్పటికే స్పృహ కోల్పోయిన హాసిని ఆస్పత్రికి తరలించి వైద్యం అందించారు. పరిస్థితి నిలకడగా ఉండడంతో ఆమె కుటుంబ సభ్యులకు అప్పగించారు. నిన్న ఆమె ఏపీలోని సొంతూరు వెళ్లింది. ఈరోజు మరోమారు ఆత్మహత్యాయత్నం చేయడం కలకలం రేపింది. ఆమెకి ఏమైంది? గతంలో తనను శారీరకంగా హింసిస్తున్నారంటూ ఓ యువకుడిపై కేసు పెట్టినట్లు తెలుస్తోంది. ఆ కేసుతో ఏమైనా సంబంధముందా? అనే అనుమానాలు వ్యక్తమవుతున్నాయి.

Also Read: