BJP ఆపరేషన్ ఆకర్ష్.. కమిటీ ఛైర్మన్‌గా ఈటల? అధికారమే లక్ష్యంగా దూకుడు

బీజేపీ జాతీయ కార్యవర్గ సమావేశాలు విజయవంతం కావడంతో.. ఆ ఊపులో తెలంగాణ బీజేపీ దూకుడు కొనసాగిస్తోంది. రాష్ట్రంలో అధికారమే లక్ష్యంగా పావులు కదుపుతోంది. ఇందులో భాగంగా ‘ఆపరేషన్‌ ఆకర్ష్‌’ను వేగవంతం చేయాలని కాషాయదళం నిర్ణయించింది. ఈ బాధ్యతలను కీలక నేతలకు అప్పగించాలని పార్టీ హైకమాండ్ సూచించినట్లు తెలుస్తోంది. ఈ నేపథ్యంలో హుజురాబాద్ ఎమ్మెల్యే ఈటల రాజేందర్‌కు ఆ బాధ్యతలు అప్పగించే అవకాశం ఉన్నట్లు పార్టీ వర్గాల్లో చర్చ జరుగుతోంది.

బీజేపీ సీనియన్ నేత ఇంద్రసేనా రెడ్డి ప్రస్తుతం పార్టీ చేరికల కమిటీ ఛైర్మన్‌గా వ్యవహరిస్తున్నారు. ఆ బాధ్యతల నుంచి తనను తప్పించాలని ఆయన ఇప్పటికే పలుమార్లు అధిష్టానాన్ని కోరినట్లు సమాచారం. దీంతో ఆ బాధ్యతలను ఈటల రాజేందర్‌కు అప్పగించాలని పార్టీ పెద్దలు భావిస్తున్నట్లు సమాచారం. చేరికల కమిటీ కో-ఛైర్మన్‌గా వివేక్ వెంకటస్వామిని నియమించే అవకాశం ఉన్నట్లు తెలుస్తోంది.

సుదీర్ఘ రాజకీయ అనుభవం ఉన్న నేతగా ఈటలకు గుర్తింపు ఉంది. ఉమ్మడి ఆంధ్రప్రదేశ్‌లో, తెలంగాణలో మంత్రిగా పని చేసిన అనుభవం ఉంది. పార్టీలకు అతీతంగా ఆయనకు మంచి సంబంధాలు ఉన్నాయి. ఈ నేపథ్యంలో ఈటలకు కొత్త బాధ్యతలు అప్పగిస్తే.. పార్టీలో చేరికలు ఎక్కువగా ఉంటాయని బీజేపీ భావిస్తున్నట్లు సమాచారం. నాంపల్లిలోని బీజేపీ రాష్ట్ర కార్యాలయంలో నేడు (జులై 5) బండి సంజయ్‌ అధ్యక్షతన పార్టీ పదాధికారులు, జిల్లా అధ్యక్షులు, ఇన్‌ఛార్జ్‌ల భేటీ జరుగనుంది. ఈ సమావేశంలో చేరికల కమిటీ బాధ్యతలను ఈటల రాజేందర్‌కు అప్పగించనున్నట్లు తెలుస్తోంది. దీంతో పాటు భవిష్యత్‌ కార్యాచరణపై చర్చించనున్నారు.