ఆ మంత్రి చరిత్ర చాలా ఉంది.. త్వరలోనే బయటపెడతా: జగ్గారెడ్డి

కరోనా వైరస్‌ను కట్టడి చేస్తున్న తీరుపై కాంగ్రెస్ ఎమ్మెల్యే జగ్గారడ్డి మరోసారి విమర్శలు చేశారు. కొద్ది రోజుల క్రితం వరకూ కేవలం హైదరాబాద్‌కే పరిమితం అనుకున్న కరోనా వైరస్ ప్రస్తుతం జిల్లాల్లోనూ వేగంగా వ్యాప్తి చెందుతోందని గుర్తు చేశారు. తెలంగాణలో అభివృద్ధి కాదని, కరోనా అభివృద్ధి చెందుతోందని ఎద్దేవా చేశారు. మంగళవారం ఆయన విలేకరులతో మాట్లాడారు. ఆరోగ్య శాఖపై విమర్శలు చేస్తూ.. ఆ శాఖ మాత్రమే మంత్రి ఈటల రాజేందర్ వద్ద ఉందని, కానీ పవర్ మొత్తం సీఎం కేసీఆర్ వద్దే ఉందని ఆరోపించారు.

మంత్రి ఈటల రాజేందర్ కేవలం కరోనా కేసుల బులెటెన్ విడుదలకే పరిమితం అయ్యారని విమర్శించారు. చివరికి హైకోర్టు అంటే కూడా ప్రభుత్వానికి లెక్కలేదని మండిపడ్డారు. రాష్ట్రానికి ఇదే చివరి అవకాశమన్న హైకోర్టు వ్యాఖ్యలను గుర్తు చేశారు. తమ పార్టీ అధికారంలో ఉంటే ఆరోగ్య మంత్రిని సంగారెడ్డి ఆసుపత్రిలో పడుకో బెట్టే వాడినని వ్యాఖ్యానించారు.

ఇటీవల మంత్రి శ్రీనివాస్ గౌడ్‌ లక్ష్యంగా జగ్గారెడ్డి తీవ్ర విమర్శలు చేసిన సంగతి తెలిసిందే. ఆ వ్యాఖ్యలపై వివాదాలు రావడంతో దానిపైనా స్పందించారు. తాను తిట్టింది మంత్రి శ్రీనివాస్ గౌడ్‌ను అని, అంతేకానీ, ఆయన కులాన్ని కాదని స్పష్టం చేశారు. శ్రీనివాస్ గౌడ్ చిట్టా చాలానే ఉందని విమర్శించారు. గౌడ సంగం నాయకులకు మంత్రి శ్రీనివాస్ గౌడ్ చరిత్ర అర్థం అయ్యేలా చెప్తానని అన్నారు. మంత్రి శ్రీనివాస్ గౌడ్ డూప్లికేటు ఉద్యమకారుడని, నిజమైన ఉద్యమకారుడు స్వామి గౌడ్ అని చెప్పారు.

మరోవైపు, తెలంగాణ ఉద్యమంలో చురుగ్గా పాల్గొన్న టీజీవో నాయకుడు ఏలూరి శ్రీనివాస్ ఎక్కడికి వెళ్లిపోయాడని జగ్గారెడ్డి ప్రశ్నించారు. టీజీవో సత్యనారాయణ, మమత, మంత్రి శ్రీనివాస్ గౌడ్‌ల చరిత్ర అంతా బయటపెడతానని చెప్పారు. మమత భర్త పదవి విరమణ పొడిగింపునకు, గౌడ సంగానికి సంబంధమేంటని జగ్గారెడ్డి ప్రశ్నించారు.