దుప్పట్లు మోసిన ఎమ్మెల్యే... వరద బాధితులకు సీతక్క సాయం

తెలంగాణలో ఎమ్మెల్యే సీతక్క గురించి తెలియని వారుండారు. తన నియోజకవర్గ ప్రజలకు నిత్యం సేవ చేస్తూ... ఎలాంటి కష్టం వచ్చినా ఆదుకునేందుకు ఆమె ఎల్లప్పుడూ సిద్ధంగా ఉంటుంది. కరోనా లాక్ డౌన్ కారణంగా గిరిజన గ్రామాలకు కాలినడకన వెళ్లి అక్కడున్న వారికి నిత్యావసరాలు అందించింది ఎమ్మెల్యే సీతక్క. తాజాగా ఈ మహిళా ఎమ్మెల్యే వరద ముంపు బాధితులను చేయూతనందించారు. రోడ్డు మార్గం లేకపోవడంతో పడవలో వెళ్లిన ఎమ్మెల్యే.. స్వయంగా దుప్పట్లను తలపై పెట్టుకొని మోసుకెళ్లారు. పేదలపై తనకున్న మమకారాన్ని ఆమె మరోసారి చాటిచెప్పారు.

ములుగు జిల్లా ఏటూరునాగారం మండలం ఎలిశెట్టిపల్లి, ఓడవాడ, ఆచార్య నగర్, నందమూరి నగర్‌ తదితర ప్రాంతాలు ఇటీవల వరద ముంపునకు గురయ్యాయి. దీంతో మేరకు రాబిన్‌ ఉడ్‌ ఆర్మీ బాధ్యులు రమ – దామోదర్‌ ఆధ్వర్యాన ఆయా ప్రాంతాల్లో బాధితులకు మంగళవారం చీరలు, దుప్పట్లు, నిత్యావసర సరుకులు పంపిణీ చేశారు. ఈ కార్యక్రమాల్లో పాల్గొన్న సీతక్క.. ఎలిశెట్టిపల్లికి వెళ్లే క్రమంలో రోడ్డు మార్గం లేకపోవడంతో పడవపై ప్రయాణం చేశారు. పడవలో జంపన్న వాగు దాటారు. అక్కడ దిగాక కొద్దిదూరం నడవాల్సి ఉండటంతో ఇతరులతో కలసి నడుస్తూ దుప్పట్లు తలపై మోసుకుంటూ సీతక్క స్వయంగా దుప్పట్లను తలపై మోసుకుంటూ వెళ్లారు. బాధితులకు సరుకులు పంపిణీ చేసి ధైర్యం చెప్పారు.
Read More: ఇద్దరికి రెండోసారి కరోనా పాజిటివ్... వైద్యశాఖ అప్రమత్తం
ములుగు నియోజకవర్గంలోని ఏటూరునాగారం, తాడ్వాయి, ములుగు, వెంకటాపురం, గోవిందరావుపేట, మంగపేట, కొత్తగూడ మండలాల్లోని గిరిజన గ్రామాల్లో సీతక్క నిర్విరామంగా పర్యటిస్తూ ఉంటారు. ఎప్పటికప్పుడు అక్కడి ప్రజల అవసరాల్ని కష్టాల్ని తెలుసుకొని వారికి అండగా ఉంటున్నారు. ఇటీవల తాడ్వాయి మండలంలోని మేడారం గ్రామంలో ఉన్న ఇతర రాష్ట్రాల వలస కూలీలకూ కుటుంబానికి 5 కిలోల బియ్యం, ఇతర సరకులు, కూరగాయలు సీతక్క అందచేశారు.