సీతక్కా.. నువ్వు అమ్మ, చరిత్రలో నిలిచిపోతావ్

కరోనా మహమ్మారితో లాక్ డౌన్ అమలవుతున్న వేళ ములుగు నియోజకవర్గ కాంగ్రెస్ ఎమ్మెల్యే సీతక్క అందిస్తున్న సేవా కార్యక్రమాలపై ప్రశంసల వర్షం కురుస్తోంది. సోషల్ మీడియాలో దీనికి సంబంధించిన ఫోటోలు విపరీతంగా వైరల్ అవుతున్నాయి. కనీసం రోడ్డు మార్గం కూడా లేని గిరిజన గ్రామాలకు సైతం కాలినడకన వెళ్లి, వారికి ఎమ్మెల్యే నిత్యావసరాలు అందిస్తున్నారు. మరికొన్ని గ్రామాల్లో భోజన ఏర్పాట్లు కూడా చేస్తున్నారు. లాక్ డౌన్ అమలైన దగ్గర్నుంచి ఆమె ఈ పనులు చేస్తూనే ఉన్నారు. గిరిపుత్రులతో మమేకమై, ఓ సాధారణ మహిళగా సాయం అందిస్తూనే ఉన్నారు.

అంతేకాక, ప్రతి ఒక్కరు పేదలకు సాయం అందించాలని కోరుతున్నారు. దీనికోసం ‘గో హంగర్‌ గో’ అనే ఛాలెంజ్‌ను ప్రారంభించించి.. ఎంపీ రేవంత్ రెడ్డి, మాజీ ఎంపీ కొండా విశ్వేశ్వర్ రెడ్డి తదితరులకు సవాలు కూడా విసిరారు. తాజాగా ఆదివారం కూడా ఎమ్మెల్యే సీతక్క నిత్యావసరాల పంపిణీలో పాల్గొన్నారు. తాజాగా వాజేడు మండలం పొనుగోలు గ్రామంలో బియ్యం, నిత్యావసరాలను పేదలకు పంచారు. ఇందుకోసం నిత్యావసరాల సంచులను కొద్ది దూరం బైక్‌పై‌ తీసుకెళ్లారు. అక్కడి నుంచి దారి లేకపోవడంతో రాళ్ల మధ్య నుంచి నడుచుకుంటూ వెళ్లారు.

Must Read: undefined

ఇలా దాదాపు 16 కిలో మీటర్ల దూరం ప్రయాణించి ఆ గిరిజన ఊరికి చేరుకున్నారు. రోడ్డు కూడా సరిగా లేని మార్గంలో నిత్యావసరాల సంచులను తలపై పెట్టుకొని, చేతులతో సంచులు మోసుకుంటూ రాళ్ల మధ్యలో మోసుకెళ్లారు. ఇందుకు సంబంధించిన వీడియోలు ప్రస్తుతం వైరల్‌గా మారాయి. ‘‘సీతక్కా మిమ్మల్ని చరిత్ర గుర్తుంచుకుంటుంది. మీకు భగవంతుడు మరింత శక్తి ఇవ్వాలని కోరుకుంటున్నాం. నువ్వు నిజంగా అక్కవు కాదు.. అమ్మవు’’ అంటూ నెటిజన్లు ఆమెపై ప్రశంసల జల్లు కురిపిస్తున్నారు.

Must Read: undefined