MLC Kavitha: నాకు ఏ నోటీసులు రాలేదు.. వాళ్ల టైం వేస్ట్ చేయకండి

MLC Kavitha: దేశంలో సంచలనంగా మారిన ఢిల్లీ లిక్కర్ స్కామ్‌ కేసు (Delhi liquor scam case) లో ఎన్‌ఫోర్స్‌మెంట్ డైరెక్టరేట్ (Enforcement Directorate) దూకుడు పెంచింది. హైదరాబాద్‌లో ఈడీ అధికారులు మరోసారి సోదాలు (ED Raids) నిర్వహిస్తున్నారు. దేశవ్యాప్తంగా హైదరాబాద్ సహా మొత్తం 40 ప్రాంతాల్లో సోదాలు చేస్తున్నారు. 25 బృందాలుగా ఏర్పడిన ఈడీ అధికారులు.. హైదరాబాద్‌లోని పలువురి ఇళ్లు, కార్యాలయాల్లో సోదాలు జరుపుతున్నారు. ఈ నేపథ్యంలో.. తనపై వచ్చిన ఆరోపణలపై ఎమ్మెల్సీ కల్వకుంట్ల కవిత (Kalvakuntla Kavitha) మరోసారి ఘాటుగా స్పందించారు. కుంభకోణంలో ఇప్పటికే తీవ్ర ఆరోపణలు ఎదుర్కొన్న కవిత.. ట్విట్టర్ వేదికగా తీవ్రస్థాయిలో ఆగ్రహం వ్యక్తం చేశారు.

ఢిల్లీ లిక్కర్ కుంభకోణం కేసులో తనకు ఇప్పటివరకు ఎలాంటి నోటీసులు అందలేదని కవిత స్పష్టం చేశారు. ఢిల్లీలో కూర్చున్న కొందరే కావాలని తనపై దుష్ప్రచారం చేస్తున్నారని ఆరోపించారు. దేశంలో ఈడీ దూకుడు పెంచి సోదాలు నిర్వహిస్తోన్న తరుణంలో కవిత ట్వీట్ చేయటం ఇప్పుడు చర్చనీయాంశంగా మారింది.

" ఢిల్లీలో కూర్చొని కొందరు చేస్తున్న దుష్ప్రచారం చేస్తూ.. మీడియాను తప్పుదారి పట్టిస్తున్నారు. నిజాన్ని మాత్రమే జనాలకు చేరవేయాలని మీడియాకు విజ్ఞప్తి చేస్తున్న. దాని వల్ల వీక్షకుల విలువైన సమయాన్ని కాపాడినవాళ్లవుతారు. నాకు ఎలాంటి నోటీసులు అందలేదని మరోకసారి తెలియజేస్తున్నాను." అంటూ ఎమ్మెల్సీ కవిత ట్వీట్ చేశారు.

దిల్లీ లిక్కర్ స్కామ్లో తనకు సంబంధం ఉందని ఆరోపణలు చేసిన పలువురు బీజేపీ నేతలపై ఎమ్మెల్సీ కవిత ఇప్పటికే పరువునష్టం దావా వేశారు. పిటిషన్‌పై స్పందించిన న్యాయస్థానం.. ఎమ్మెల్సీ కవిత పరువుకు నష్టం కలిగేలా వ్యాఖ్యలు చేయొద్దని ఎంపీ పర్వేశ్‌వర్మ, మాజీ ఎమ్మెల్యే మజుందర్‌ సిర్సాను ఆదేశించింది. సభలు, మీడియా, సామాజిక మాధ్యమాల్లో నిరాధార ఆరోపణలు చేయొద్దని పేర్కొంటూ పర్వేశ్‌వర్మ, మజుందర్‌కు కోర్టు నోటీసులు జారీ చేసింది.

• Read More Telangana News and Telugu News