మంత్రుల కార్లు ఓవర్ స్పీడ్.. జరిమానాలు వేసినా తగ్గడం లేదుగా

చట్టాలు రూపకల్పన చేసే తమకు చట్టం వర్తించదని అంటున్నారు తెలంగాణలోని ప్రజాప్రతినిధులు. ప్రజలందరూ ట్రాఫిక్ రూల్స్ పాటించాలి, రోడ్లపై క్రమశిక్షణగా ఉండాలి అని సందేశాలు దంచే నేతలు వారు మాత్రం నిబంధనలు పాటించకుండా దర్జాగా రోడ్లపై తిరుగుతున్నారు. తెలంగాణ మంత్రుల వాహనాలు రహదారులపై దూసుకుపోతున్నాయి. తాజాగా మంత్రుల వాహనాలపై ఉన్న జరిమానాలను పరిశీలిస్తే అధిక భాగం ఓవర్ స్పీడ్‌కు సంబంధించినవే కావడం గమనార్హం.

Also Read: ఎస్సైనే చంపబోయారు.. దుండిగల్‌లో దొంగల బీభత్సం

మంత్రులు తరుచూ వివిధ జిల్లాలు, నియోజకవర్గాల పర్యటనలకు హైదరాబాద్ నుంచి వెళ్లేటప్పుడు ఔటర్ రింగ్‌రోడ్, రాష్ట్ర రహదారుల మీదుగా ప్రయాణిస్తుంటారు. ఈ సమయంలో వారి వాహనాల స్పీడ్ 100కి.మీ దాటుతున్నట్లు స్పీడ్ లేజర్ గన్‌లు పసిగడుతున్నాయి. మంత్రులతో పాటు ఎమ్మెల్యేలు, ఎమ్మెల్సీల వాహనాలు సైతం పరిమితికి మించిన వేగంతో దూసుకుపోతున్నట్లు తేలింది. దీంతో పోలీసులు ఆయా మంత్రులకు చలాన్లు పంపించినా ఎలాంటి స్పందన ఉండటం లేదు. ఈ లిస్టులో మంత్రులు హరీశ్‌రావు, జగదీశ్‌రెడ్డి, గంగుల ప్రతాప్‌రెడ్డి, ఈటల రాజేందర్ తదితరులు కూడా ఉండటం గమనార్హం.

Also Read: స్పీకర్ ఇంట్లో లంచ్ చేసిన కేసీఆర్ దంపతులు

ఈ విషయంపై సోషల్‌మీడియాలోనూ పెద్ద దుమారం రేగుతోంది. ట్రాఫిక్ ఉల్లంఘించిన సాధారణ పౌరుల నుంచి ముక్కు పిండి జరిమానాలు వసూలుచేసే పోలీసులు ప్రజాప్రతినిధులను ఎందుకు పట్టించుకోవడం లేదంటూ ప్రశ్నిస్తున్నారు. ట్రాఫిక్ రూల్స్ పాటించాల్సిన బాధ్యత పౌరులతో పాటు మంత్రులు, ఎమ్మెల్యేలకు కూడా ఉంటుందని సలహా ఇస్తున్నారు. ఈ దూకుడు అభివృద్ధి కార్యక్రమాలపై పెడితే బాగుంటుందని కొందరు సెటైర్లు వేస్తున్నారు.