విషాదం.. ముగ్గురు పిల్లలతో కలిసి తల్లి ఆత్మహత్య

ఉమ్మడి మహబూబ్‌నగర్‌ జిల్లాల్లో తీవ్ర విషాద ఘటనలు జరిగాయి. మంగళవారం జోగులాంబ గద్వాల జిల్లాలో ఓ తల్లి తన ముగ్గురు పిల్లలతో కలిసి ఆత్మహత్యకు పాల్పడింది. జోగులాంబ గద్వాల జిల్లా కేటీదొడ్డి మండలంలోని చెట్ల మల్లాపురం గ్రామాంలో చిన్న తంబయ్య, సత్తమ్మ దంపతులు నివసిస్తున్నారు. వీరికి ముగ్గురు పిల్లలు. అయితే, మంగళవారం సత్తమ్మ(32) తన ముగ్గురు పిల్లలైన నందిని(10), శివాని(3), బుజ్జి (1)ను తీసుకొని గ్రామానికి దగ్గర్లో ఉన్న చెరువు వద్దకు చేరుకుంది. అక్కడ ముగ్గురు పిల్లల్ని కూడా చెరువులోకి తోసేసింది. తాను కూడా చెరువులోకి దూకి ఆత్మహత్య చేసుకుంది.

సత్తమ్మ ఆత్మహత్యకు కుటుంబ కలహాల కారణమని గ్రామస్థులు చెబుతున్నారు. పోలీసులు కేసు నమోదు చేసి దర్యాప్తు చేస్తున్నారు. భర్తను అదుపులోకి తీసుకొని విచారిస్తున్నారు. మరోవైపు నాగర్‌కర్నూల్‌ జిల్లాలో ఇద్దరు చిన్నారులు అనుమానాస్పద స్థితిలో సంపు గుంతలో పడి మృతిచెందారు. నాగర్‌కర్నూల్‌ జిల్లా తెలకపల్లి మండలం గడ్డంపల్లి గ్రామానికి చెం దిన తలుపునూరు నిర్మలయ్య- బాగ్యలక్ష్మికి ఇద్దరు కూతుళ్లు. ఒకరికి ఐదేళ్లు, మరొకరికి మూడేళ్లు. పిల్లలిద్దరూ తలుపునూరు నరసింహ అన్న లక్ష్మయ్య ఇంటి ముందు ఉన్న సంపు గుంతలో పడి మృతిచెందారు.

Read More: ఓడిపోయినందుకు 101 కొబ్బరికాయలు కొట్టిన టీఆర్ఎస్ నేత

స్థానికులు చూసి పోలీసులకు సమాచారమందించారు. సీఐ గాంధీ నాయక్‌, ఎస్‌ఐ జి.విజరు కుమార్‌ అక్కడికి వెళ్లి చిన్నారుల మృతదేహాలను, పరిసరాలను పరిశీలించారు. చిన్నారుల మృతిపై అనుమానాలు వ్యక్తమవడంతో అనుమానాస్పద మృతి గా కేసు దర్యాప్తుచేస్తున్నారు. తమ పిల్లలిద్దరూ సంపులో పడి మృతిచెందడంతో తల్లి దండ్రులు కన్నీరుమున్నీరుగా విలపిస్తున్నారు.