కేటీఆర్ పెళ్లి రోజు.. అరుదైన ఫొటోతో శుభాకాంక్షలు చెప్పిన తమ్ముడు!

టీఆర్ఎస్ పార్టీ వర్కింగ్ ప్రెసిడెంట్, తెలంగాణ ఐటీ మంత్రి కేటీఆర్ పెళ్లి రోజు నేడు. 1976లో జన్మించిన కేటీఆర్.. అమెరికాలో ఎంబీఏ చేసిన అనంతరం అక్కడే కొన్నాళ్లు ఉద్యోగం చేసిన సంగతి తెలిసిందే. 2006లో ఉద్యోగానికి రాజీనామా చేసిన ఆయన తర్వాత తెలంగాణ ఉద్యమంలో చేరి.. రాజకీయాల్లోకి అడుగుపెట్టారు. తండ్రికి తగ్గ తనయుడిగా గుర్తింపు తెచ్చుకున్నారు. 2003 డిసెంబర్ 18న శైలిమను పెళ్లాడారు.

కేటీఆర్, శైలిమ దంపతుల సంతానం హిమాన్షు రావు, అలేఖ్య రావు. నేడు కేటీఆర్ పెళ్లి రోజు సందర్భంగా ఆయన సోదరుడు, రాజ్యసభ సభ్యుడు సంతోష్ కుమార్ ట్విట్టర్ ద్వారా శుభాకాంక్షలు తెలిపారు. ‘పెళ్లి రోజు శుభాకాంక్షలు అన్నయ్య వదిన.. మీ ఇద్దరి మధ్య ప్రేమానురాగాలు, మీ బంధం మరింత బలపడాలి’ అని సంతోష్ ట్వీట్ చేశారు.
ఈ సందర్భంగా కేటీఆర్ పెళ్లినాటి అరుదైన ఫొటోను సంతోష్ ట్విట్టర్లో పోస్టు చేశారు. టీఆర్ఎస్ పార్టీ అభిమానులు, కార్యకర్తలు సైతం మంత్రికి వివాహ వార్షికోత్సవ శుభాకాంక్షలు తెలుపుతూ ట్వీట్లు చేస్తున్నారు.