హైదరాబాద్‌లో విషాదం.. లిఫ్ట్ గుంతలో పడి బాలుడి దుర్మరణం

హైదరాబాద్‌లోని మణికొండలో విషాదం చోటుచేసుకుంది. అపార్ట్‌మెంట్ లిఫ్ట్ గుంతలో పడి 9 ఏళ్ల ప్రాణాలు వదిలాడు. వివరాల్లోకి వెళ్తే.. పంచవటి కాలనీలోని ఓ అపార్ట్‌మెంట్‌లో శేషబట్టాచారి కుటుంబం అద్దెకు ఉంటోంది. ఆదివారం సాయంత్రం అతడి కుమారుడు ధనుష్.. అపార్ట్‌మెంట్ నాలుగో అంతస్తులోని కారిడార్‌లో ఆడుకుంటూ లిఫ్ట్ వద్దకు వెళ్లాడు. ఆ సమయంలో లిఫ్ట్ మరో ఫ్లోర్‌లో ఉంది. వాస్తవానికి లిఫ్ట్ ఉన్న ఫ్లోర్‌లోనే దాని తలుపు తెరుచుకోవాలి. కానీ నాలుగో అంతస్తులో దాని డోర్ తెరుచుకుంది.

లిఫ్ట్ డోర్ దగ్గరకు వెళ్లిన బాలుడు తొంగి చూస్తూ.. ప్రమాదవశాత్తూ కాలు జారి లిఫ్ట్ గోతిలో పడిపోయాడు. తలకు బలమైన గాయం కావడంతో అక్కడికక్కడే ప్రాణాలు కోల్పోయాడు. సమాచారం అందుకున్న పోలీసులు సంఘటనా స్థలికి చేరుకొని.. అపార్ట్‌మెంట్ లిఫ్ట్‌ను పరిశీలించారు. కేసు నమోదు చేసి దర్యాప్తు ప్రారంభించారు.

కొద్ది రోజుల క్రితం విజయవాడలోని గవర్నర్ పేటలో లిఫ్ట్ కారణంగా ఓ యువకుడు చనిపోయాడు. షేక్ ఇర్ఫాన్ అనే యువకుడు లిఫ్ట్ కోసం బటన్ నొక్కాడు. లిఫ్ట్ రాలేదు కానీ డోర్ తెరుచుకుంది. ఈ విషయాన్ని సరిగా గమనించని ఇర్ఫాన్.. లోపలికి వెళ్లి కిందపడి చనిపోయాడు.