KTR పిలుపు.. రక్తదానం చేసిన కవిత

నిజామాబాద్ మాజీ ఎంపీ కల్వకుంట్ల కవిత రక్తదానం చేశారు. తన అన్న కేటీఆర్ పిలుపు మేరకు ఆమె ఈ మంచి పని చేశారు. లాక్‌డౌన్ కారణంగా చాలా వరకు బ్లాడ్ బ్యాంకుల్లో రక్తం నిల్వలు కనిష్ట స్థాయికి చేరుకున్నాయి. దీంతో తలసేమియాతో బాధపడుతున్న వారికి ఎక్కించడానికి రక్తం కొరత తలెత్తే అవకాశం ఉంది. ఈ విషయం మంత్రి కేటీఆర్ దృష్టికి రావడంతో తెలంగాణ రాష్ట్ర సమితి ఆవిర్భావ దినోత్సవం సందర్భంగా రక్తదానం చేయాలని పిలుపునిచ్చారు.

అన్నయ్య పిలుపునకు స్పందించిన కవిత హైదరాబాద్‌లోని తన నివాసంలో శుక్రవారం రక్తదానం చేశారు. రక్తదానం చేయడం వల్ల తలసేమియా బాధితుల ప్రాణాలను కాపాడవచ్చని.. ఇతర అత్యవసర చికిత్సలకు సాయం అందించడానికి రక్తదానం ఉపయోగపడుతుందని తెలిపారు. రక్తదానం చేసే సమయంలో మాస్క్‌లు ధరించిన తగిన జాగ్రత్త చర్యలు తీసుకున్నారు.