Ration Card: రేషన్ కార్డు దరఖాస్తుదారులకు షాక్.. ఇక ఇప్పట్లో లేనట్లే..

Ration Card: తెలంగాణలో కొత్తగా దరఖాస్తు చేసుకున్నవారికి రేషన్ కార్డులు జారీ చేస్తామని ప్రభుత్వం ఎప్పటినుంచో చెబుతోంది. మంత్రి కేటీఆర్, పౌరసరఫరాలశాఖ మంత్రి గంగుల కమలాకర్ పలుమార్లు కొత్త రేషన్ కార్డులను జారీ చేస్తామని చెప్పారు. దీంతో కొత్తగా రేషన్ కార్డులకు దరఖాస్తు చేసుకున్నవారు ఆశలు పెట్టుకున్నారు. కానీ ప్రభుత్వం కొత్త రేషన్ కార్డుల జారీ ప్రక్రియలో జాప్యం చేస్తూ వస్తోంది. అయితే ఇప్పుడు కొత్త రేషన్ కార్డులను జారీ చేసే ఆలోచన లేదని పౌరసరఫరాలశాఖ చెబుతోంది. కొత్త రేషన్ కార్డుల జారీపై ప్రభుత్వం నుంచి ఎలాంటి ప్రతిపాదన లేదని పౌరసరఫరాలశాఖ అధికారులు చెబుతున్నారు. దీంతో కొత్త రేషన్ కార్డుల జారీ ఇప్పట్లో లేనట్లేనని తెలుస్తోంది. కొత్త రేషన్ కార్డుల కోసం చాలామంది దరఖాస్తు చేసుకున్నారు. అయితే వారికి ఇంకా రేషన్ కార్డులను జారీ చేయలేదు. జూన్ నుంచి జారీ చేస్తారనే ప్రచారం జరుగుతోంది. దీంతో చాలామంది రేషన్ కార్డు దరఖాస్తుదారులు ఆశలు పెట్టుకున్నారు.

ప్రభుత్వం నుంచి తమకు ఎలాంటి ఆదేశాలు రాలేదని పౌరసరఫరాలశాఖ అధికారులు చెప్పడం, మరో ఆరు నెలల్లో ఎన్నికలు ఉండటతో కొత్త రేషన్ కార్డుల జారీ ఉండదని తెలుస్తోంది. అయితే 2018 ఎన్నికలకు ముందు రేషన్ కార్డుల కోసం ప్రభుత్వం దరఖాస్తులు ఆహ్వానించింది. 9 లక్షల మంది దరఖాస్తు చేసుకోగా.. 2021 వరకు పలు విడతల్లో 3.11 లక్షల మందికి కార్డులను జారీ చేసింది. ఆ తర్వాత నుంచి కొత్త కార్డుల జారీని నిలిపివేసింది.

ప్రస్తుతం రాష్ట్రంలో 90.14 లక్షల ఆహార భద్రత కార్డులు ఉన్నాయి. జాతీయ ఆహార భద్రత చట్టం కింద 48.86 లక్షల కార్డులు ఉండగా.. అంత్యోదయ అన్నయోజన పథకం కింద 5.52 లక్షల కార్డులు ఉన్నాయి. ఇక రాష్ట్ర ప్రభుత్వమే పూర్తి సబ్సిడీ కల్పిస్తూ ఇచ్చిన కార్డులు 35.66 లక్షలు ఉన్నాయి. ఇక వీటిల్లో 5,211 కార్డులు అన్నపూర్ణ పథకం క్రింద ఉన్నాయి. అన్నపూర్ణ పథకం కింద కార్డు కలిగినవారికి 10 కిలోల బియ్యం ఉచితంగా అందిస్తున్నారు. ఇక మిగతా రేషన్ కార్డులు ఉన్నవారికి ప్రతీనెలా 6 కిలోల బియ్యాన్ని రూపాయి చొప్పున అందజేస్తారు.

• Read More Telangana News And Telugu News