హైదరాబాద్‌లో నకిలీ శాంపూల దందా.. గుట్టురట్టు చేసిన పోలీసులు

నకిలీ ఉత్పత్తులు తయారు చేసే వారిపై నిఘా విభాగం ఉక్కు పాదం మోపుతున్నా కూడా కొందరు అక్రమార్కులు అడ్డదారులు తొక్కుతున్నారు. కేవలం డబ్బులు సంపాదించాలనే లక్ష్యంగా నకిలీ నిత్యావసర వస్తువులను తయారుచేసి అమాయకులైన జనానికి విక్రయించి సొమ్ము చేసుకుంటున్నారు. తాజాగా హైదరాబాద్ పేట్ బషీర్‌బాగ్ పోలీసులు నకిలీ శాంపూల తయారీ గుట్టును రట్టు చేశారు. అక్రమంగా తయారు చేస్తున్న రూ.20 లక్షల విలువ చేసే నకిలీ క్లినిక్ శాంపూలు, కంఫర్ట్ లిక్విడ్‌ సరకులను స్వాధీనం చేసుకున్నారు. పేట్ బషీరాబాద్ పీఎస్ పరిధిలోని పద్మా నగర్ ఫేస్-2లో టాస్క్ ఫోర్స్, బాలానగర్ ఎస్ఓటీ పోలీసులు సంయుక్త దాడులు చేశారు.

రహస్య సమాచారం మేరకు బాలానగర్ నగర్ జోన్ ఎస్ఓటీ, స్థానిక పేట్ బషీరాబాద్ పోలీసులు ఓ కుటీర పరిశ్రమపై దాడి చేయగా, దాదాపు రూ.20 లక్షల విలువ చేసే నకిలీ శాంపూలు, కంఫర్ట్ లిక్విడ్‌తో పాటు ఇద్దరు నిందితులను అదుపులోకి తీసుకున్నారు. వీరిలో మరో నిర్వహకుడు పరారీలో ఉన్నట్లు పోలీసులు తెలిపారు. పేట్ బషీరాబాద్ పోలీసులు కేసు నమోదు చేసుకొని దర్యాప్తు చేస్తున్నారు.

Must Read: undefined