టీఆర్ఎస్ ఎమ్మెల్యే సంచలన నిర్ణయం!!

తెలంగాణలోని పినపాక నియోజకవర్గ ఎమ్మెల్యే రేగా కాంతారావు సంచలనం నిర్ణయం తీసుకున్నారు. తనకు భద్రత కల్పిస్తున్న వ్యక్తిగత సిబ్బందిని తిరస్కరిస్తూ బుధవారం ప్రభుత్వానికి ఓ లేఖ రాశారు. తను ఒక సాధారణ రైతు కుంటుంబం నుంచి రాజకీయల్లోకి వచ్చానని తెలిపారు. తనకు, తన నియోజక వర్గ ప్రజలకు సామాన్యుడిగా ఉండటమే ఇష్టం అని పేర్కొన్నారు. హంగూ ఆర్భాటాలతో ప్రజల్లోకి వెళ్లడం నచ్చదని తెలిపారు. తను ఎలాంటి తప్పు చేయలేదని, అందువల్ల ప్రాణ భయం లేదని లేఖలో రాశారు. పినపాక నియోజకవర్గ ప్రజలే తనకు రక్షణగా ఉంటారని పేర్కొన్నారు.


2018 ఎన్నికల అనంతరమే భద్రతా సిబ్బందిని తిరస్కరిద్దామనుకున్నప్పటికీ, అప్పటి ఉద్రిక్త పరిస్థితుల వల్ల సాధ్యం కాలేదని వివరించారు. గన్‌మెన్‌లను వెనక్కి పంపుతూ తీసుకున్న నిర్ణయం వెనక ఎలాంటి ఒత్తిడి లేదని ఎమ్మెల్యే రేగా కాంతారావు స్పష్టం చేశారు. తన భద్రతకు నియమించిన ఆరుగురు గన్‌మెన్‌లను ప్రజల రక్షణ కోసం ఉపయోగించాల్సిందిగా ప్రభుత్వాన్ని కోరుతున్నట్లు పేర్కొన్నారు. స్వాతంత్య్ర దినోత్సవం సందర్భంగా ఇక నుంచి ప్రజల్లోకి స్వేచ్ఛగా వెళ్లాలని నిర్ణయించుకున్నట్లు కాంతారావు తెలిపారు.

గతేడాది డిసెంబర్‌లో నిర్వహించిన తెలంగాణ అసెంబ్లీ ఎన్నికల్లో రేగా కాంతారావు పినపాక నియోజకవర్గం నుంచి కాంగ్రెస్ పార్టీ తరఫున పోటీ చేశారు. ఆయన సమీప ప్రత్యర్థి అయిన టీఆర్ఎస్ అభ్యర్థి పాయం వెంకటేశ్వర్లుపై ఘన విజయం సాధించారు. అనంతరం నియోజక అభివృద్ధి కోసం పార్టీ ఫిరాయించి టీఆర్ఎస్‌లో చేరారు.