అసెంబ్లీలో ఇకపై మట్టి కుండలు, గ్లాసులు

శాసనసభలో మట్టి కుండలు, గ్లాసులు ప్రవేశపెట్టనున్నట్లు స్పీకర్ పోచారం శ్రీనివాస్ రెడ్డి తెలిపారు. అసెంబ్లీ పరిసరాలను ప్లాస్టిక్‌ ఫ్రీ జోన్‌గా ప్రకటిస్తున్నామని వెల్లడించారు. ఇకపై పర్యావరణహితమైన వస్తువులనే వాడుతామని తెలిపారు. రాజ్యసభ సభ్యుడు సంతోష్ కుమార్ ప్రారంభించిన గ్రీన్‌ ఛాలెంజ్‌ అత్యంత విజయవంతంగా కొనసాగుతోందని పేర్కొన్నారు. ఈ సందర్భంగా ఎంపీ సంతోష్‌ కుమార్‌కు అభినందనలు తెలిపారు.

తెలంగాణకు హరితహారం నిర్వహణకు గ్రీన్‌ ఛాలెంజ్‌ అదనపు ఆకర్షణగా నిలిచిందని స్పీకర్ పోచారం పేర్కొన్నారు. దేశ, విదేశాల్లో ఎంతో మందికి సంతోష్‌ కుమార్‌ కృషి ఆదర్శంగా నిలిచిందని కితాబిచ్చారు. తాను కూడా గ్రీన్‌ ఛాలెంజ్‌లో పాల్గొని మొక్కలు నాటినట్లు తెలిపారు.

Also Read: పాకిస్థాన్‌లో తెలుగు యువకుడి అరెస్టు.. వీడియో రిలీజ్

‘ఇకపై అసెంబ్లీలో ప్లాస్టిక్‌ వస్తువులు, బాటిళ్లను వినియోగించబోం. పర్యావరణహిత వస్తువులనే వాడుతాం. మట్టితో తయారైన నీటి కుండలు, గ్లాసులు ప్రవేశపెడుతున్నాం’ అని స్పీకర్ పోచారం తెలిపారు. హైదరాబాద్‌లో సోమవారం (నవంబర్ 18) ఆయన మీడియాతో మాట్లాడారు.