సభ్యసమాజం తలదించుకునేలా వ్యాఖ్యలు.. జగ్గారెడ్డిపై ఫిర్యాదు

కాంగ్రెస్‌ సీనియర్ నేత, సంగారెడ్డి ఎమ్మెల్యే జగ్గారెడ్డిపై హెచ్‌ఆర్‌సీలో ఫిర్యాదు చేశారు. ఇటీవల మున్సిపల్‌ ఎన్నికల ప్రచారంలో మాట్లాడుతూ మంత్రి హరీశ్ రావును ఆయన అసభ్య పదజాలంతో దూషించిన సంగతి తెలిసిందే. జగ్గారెడ్డి వ్యాఖ్యలపై తెలంగాణ ప్రైవేట్‌ ఉద్యోగుల సంఘం ఆగ్రహం వ్యక్తం చేసింది. ఆయనపై చర్యలు తీసుకోవాలని రాష్ట్ర మానవ హక్కుల సంఘంలో మంగళవారం (జనవరి 21) ఫిర్యాదు చేసినట్లు తెలంగాణ ప్రైవేట్ ఉద్యోగుల సంఘం తెలిపింది.

బాధ్యతాయుతమైన పదవిలో ఉండి రాజ్యాంగ విరుద్ధంగా మంత్రి హరీశ్ రావుపై జగ్గారెడ్డి అనుచిత వాఖ్యలు చేశారని ప్రైవేట్‌ ఉద్యోగుల సంఘం రాష్ట్ర అధ్యక్షుడు గంధం రాములు మండిపడ్డారు. జగ్గారెడ్డి తక్షణం హరీశ్ రావుకి, తెలంగాణ సమాజానికి క్షమాపణ చెప్పాలని ఆయన డిమాండ్‌ చేశారు. ప్రభుత్వం, కేసీఆర్ కుటుంబంపై అనుచితన వాఖ్యలు చేస్తే ఊరుకోమని ఈ సందర్భంగా ఆయన హెచ్చరించారు.

జగ్గారెడ్డి భాష మార్చుకోకపోతే ఆయన ఇంటిముందు ధర్నా చేస్తామనాని గంధం రాములు పేర్కొన్నారు. జగ్గారెడ్డి వ్యాఖ్యలపై ఇప్పటికే పలువురు నేతలు ఆగ్రహం వ్యక్తం చేసిన విషయం తెలిసిందే. మంత్రి హరీశ్‌ రావుకు వస్తున్న ఆదరణను చూసి ఓర్వలేకే జగ్గారెడ్డి కుసంస్కారంతో మాట్లాడుతున్నారని మాజీ ఎమ్మెల్యే చింత ప్రభాకర్‌ విమర్శించారు. సభ్యసమాజం సిగ్గుపడేలా జగ్గారెడ్డి మాట్లాడరన్నారు.

Must Read: టీఆర్‌ఎస్ ఖబర్దార్, నోరు అదుపులో పెట్టుకోండి.. అక్బరుద్దీన్ సంచలనం

సంగారెడ్డి ప్రజలు తలదించుకునేలా జగ్గారెడ్డి మాట్లాడారని చింత ప్రభాకర్ ధ్వజమెత్తారు. సదాశివపేటలో జగ్గారెడ్డి కూతురు ప్రచారానికి వెళితే కూడా ఓటర్లు నిలదీస్తున్నారని ఎద్దేవా చేశారు. సానుభూతి కోసమే జగ్గారెడ్డి అసభ్య పదజాలాన్ని వాడుతున్నారని.. అరెస్టు చేసి పోలీసు స్టేషన్‌కు తరలిస్తే సానుభూతి వస్తుందని భ్రమపడుతున్నారని ఆయన ఆరోపించారు.

మంత్రి పట్ల జగ్గారెడ్డి వాడిన భాషకు సిగ్గుతో తలదించుకోవాలని మాజీ ఎమ్మెల్సీ సత్యనారాయణ మండిపడ్డారు. తులసి వనంలో గంజాయి మొక్కలా జగ్గారెడ్డి వ్యవహారం ఉందన్నారు. సంగారెడ్డి ప్రజలకు తలవంపులు తెస్తున్న జగ్గారెడ్డికి మున్సిపాలిటీ ఎన్నికల్లో గట్టి బుద్ధి చెప్పాలని ఆయన కోరారు.

Also Read: అవసరమైతే అభ్యర్థి ఎన్నిక రద్దు చేస్తాం: ఈసీ నాగిరెడ్డి