చింతమడకలా చేయండి సార్.. కేసీఆర్ ఫోటో వద్ద మద్యం ఉంచి!

సీఎం కేసీఆర్ చిత్రపటం వద్ద మద్యం, మాంసాహారం ఉంచి నిరసన చేపట్టారు. ఈ వినూత్న తరహాలో నిరసన కార్యక్రమం హైదరాబాద్‌లోని సైదాబాద్ పరిధిలోని సింగరేణి కాలనీలో బుధవారం (సెప్టెంబర్ 4) జరిగింది. సైదాబాద్‌లోని సింగరేణి కాలనీ బస్తీని చింతమడకగా మార్చాలని.. నిరసనకారులు డిమాండ్ చేశారు. చింతమడక తరహాలోనే ప్రభుత్వం నిధులు మంజూరు చేయాలని కోరారు.

సీపీఐ రాష్ట్ర నాయకుడు శంకర్ నాయక్ ఆధ్వర్యంలో గిరిజనులు ఈ వినూత్న నిరసన కార్యక్రమం చేపట్టారు. గిరిజన సంప్రదాయం ప్రకారం.. కేసీఆర్ చిత్రపటం వద్ద మద్యం, మాంసాహారం ఉంచి వినతిపత్రం సమర్పించారు. ముఖ్యమంత్రి తన సొంత గ్రామం చింతమడకను అభివృద్ధి చేసినట్లుగానే సింగరేణి కాలనీని అభివృద్ధి చేయాలని కోరారు. ప్రజా సమస్యలు పరిష్కరించాలని కోరారు. ఈ కార్యక్రమంలో పలువురు సీపీఐ నాయకులు, గిరిజనులు పాల్గొన్నారు.

Don't Miss: శంషాబాద్ ఎయిర్‌పోర్టుకు బాంబు బెదిరింపు కేసులో ట్విస్ట్.. ఫ్రెండును ఆపడానికి!

చింతమడక వాసులకు సీఎం ఏం చెప్పారు?
సీఎం కేసీఆర్ తన సొంత గ్రామమైన చింతమడకకు ఇటీవల వరాల జల్లు కురిపించిన విషయం తెలిసిందే. రాబోయే రోజుల్లో చింతమడక బంగారు తునక కావాలని కేసీఆర్ పేర్కొన్నారు. చింతమడకలో ఏర్పాటు చేసిన ఆత్మీయ సమావేశంలో ఆయన పాల్గొని ప్రసంగించారు.

Also Read: కన్నతల్లిని చంపిన కసాయి కొడుకు.. కాళ్లు, చేతులు విరిచి

చింతమడకలో ప్రతి కుటుంబం రూ.10 లక్షలు లబ్ధి పొందేలా కార్యక్రమాలకు శ్రీకారం చుట్టబోతున్నట్లు కేసీఆర్ హామీ ఇఛ్చారు. చింతమడకకు 2 వేల ఇళ్లు మంజూరు చేస్తున్నట్లు ప్రకటించారు. కార్తీక మాసంలో చింతమడకలో గృహప్రవేశాలు జరగాలని అధికారులను ఆదేశించారు.

చింతమడక గ్రామం తనను కనిపెంచిందని కేసీఆర్ చెప్పారు. అలాంటి గ్రామం కోసం తాను ఎంత చేసినా తక్కువే అన్నారు. చింతమడక అభివృద్ధి కోసం అప్పటికప్పుడు రూ. 50 కోట్లు మంజూరు చేస్తున్నట్లు ప్రకటించారు.

చింతమడకలో అద్భుతమైన ఫంక్షన్‌ హాల్‌ నిర్మించాలని.. ప్రతి ఇంటిపై సోలార్‌ ప్యానెల్‌ ఏర్పాటు చేసుకోవాలని, అదేవిధంగా ప్రతి వీధిలోనూ సీసీ రోడ్లు వేయించుకోవాలని సూచించారు. గ్రామానికి అతి త్వరలోనే తాగు, సాగు నీరు కూడా రాబోతుందని తెలిపారు. చింతమడక గ్రామాన్ని చూసి పక్క ఊర్లు నేర్చుకునే విధంగా ఉండాలని సీఎం వ్యాఖ్యానించారు.