కాచిగూడలోని రైలు బోగీల్లో ఐసోలేషన్ వార్డులు

కరోనా మహమ్మారిని నియంత్రించడంలో తెలంగాణ ప్రభుత్వం పలు చర్యలు చేపడుతున్న సంగతి తెలిసిందే. పెరుగుతున్న కరోనా పాజిటివ్ వ్యక్తుల చికిత్స కోసం కాచిగూడ రైల్వే స్టేషన్‌లోని రైల్వే కోచ్‌లలో ఐసోలేషన్ వార్డులను ఏర్పాటు చేస్తున్నారు. ఈ మేరకు రైల్వే అధికారులు సన్నాహాలు మొదలుపెట్టారు. ఇప్పటికే ఈ విధానం దేశంలోని పలు చోట్ల అవలంబించారు. రైల్వే కోచ్‌లు ఐసోలేషన్ వార్డులుగా చక్కగా ఉపయోగపడుతుండడంతో హైదరాబాద్‌లోనూ ఆ చర్యలను అనుసరిస్తున్నారు.

కాచిగూడ రైల్వే స్టేషన్‌లో మూడు రోజుల్లో ఐసోలేషన్‌ కోచ్‌లు అందుబాటులోకు రానున్నాయి. దక్షిణమధ్య రైల్వే పరిధిలోని హైదరాబాద్‌ డివిజన్‌లో కేవలం కాచిగూడ రైల్వే స్టేషన్‌లో మాత్రమే వీటిని అందుబాటులో ఉంచాలని రైల్వే అధికారులు నిర్ణయించారు. అంతేకాకుండా కాచిగూడ రైల్వే స్టేషన్‌లో 40 ఐసోలేషన్‌ కోచ్‌లు అందుబాటులో ఉంచుతున్నారు. ఇప్పటికే 19 బోగీలను ఐసోలేషన్‌ కోచ్‌లుగా మార్చారు. మిగతా బోగీల్లో పనులు చురుకుగా సాగుతున్నాయి. ఒక్కో కోచ్‌లో 13 మంది కరోనా అనుమానితులకు చికిత్స అందించే అవకాశం ఉంటుంది. మొత్తం 500 మందికి చికిత్స అందించే అవకాశం ఉంటుందని రైల్వే అధికారులు తెలిపారు.