Telangana Rains: తెలంగాణలో భారీ వర్షాలు.. ఐఎండీ వార్నింగ్

తెలంగాణకు రెయిన్ అలెర్ట్ జారీ చేసింది హైదరాబాద్ వాతావరణ కేంద్రం.. నాలుగు రోజుల పాటు రాష్ట్రవ్యాప్తంగా పలు ప్రాంతాల్లో మోస్తరు నుంచి భారీ వర్షాలు కురిసే అవకాశముందని తెలిపింది. మధ్యప్రదేశ్‌ నుంచి ఛత్తీస్‌గఢ్‌, ఒడిశాల మీదుగా బంగాళాఖాతం వరకు 1,500 మీటర్ల ఎత్తున గాలులతో ఉపరితల ద్రోణి ఏర్పడింది. మరోవైపు ఒడిశాపై గాలులతో ఉపరితల ఆవర్తనం 3.1 కిలోమీటర్ల ఎత్తున ఉంది.

ఈ ప్రభావంతో సోమ, మంగళవారాల్లో రాష్ట్రంలో అక్కడక్కడ ఒక మోస్తరు వర్షాలు కురిసే అవకాశాలున్నాయని వాతావరణశాఖ తెలిపింది.. భూపాలపల్లి, మంచిర్యాల, ములుగు, ఆసిఫాబాద్‌, ఆదిలాబాద్‌ జిల్లాల్లో భారీ వర్షాలు పడే అవకాశం ఉందని వివరించింది. ఈ సీజన్‌లో రుతుపవనాలు మరింత ఉధృతమై మంచి వర్షాలు కురుస్తాయని వాతావరణ శాఖ అధికారులు అంచనా వేస్తున్నారు.

ఇటు ఆదివారం మధ్యాహ్నం పలు ప్రాంతాల్లో ఓ మోస్తరు వర్షాలు కురిశాయి. అత్యధికంగా రాజన్న సిరిసిల్ల జిల్లాలోని నిజాంబాద్‌లో 4.6, సిద్దిపేట జిల్లాలోని కోహెడలో 4, కరీంనగర్‌ జిల్లాలోని మల్యాలలో 4, మెదక్‌ జిల్లాలోని టేక్మాల్ లో 4, భద్రాద్రి కొత్తగూడెం జిల్లాలోని అశ్వాపురంలో 3.6 సెంటీమీటర్ల వర్షం కురిసింది. ఆదివారం అత్యధికంగా ఖమ్మం జిల్లాలోని కారేపల్లిలో 35.7 డిగ్రీల ఉష్ణోగ్రత నమోదైంది. వర్షాలతో ఉష్ణోగ్రతలు సాధారణం కన్నా 3 నుంచి 4 డిగ్రీలు తక్కువగా రికార్డయ్యాయి.