తెలంగాణకు మళ్లీ వర్షాలు.. రెండు రోజుల పాటు వానలు

తెలంగాణకు మరోసారి వర్షాలు పడుతాయన్నారు వాతావరణ శాఖ అధికారులు. బంగాళాఖాతంలో ఉపరితల ఆవర్తనం ప్రభావంతో తెలంగాణలో ఓ మోస్తారు వర్షాలు కురుస్తాయన్నారు. గురువారం,శుక్రవారం వానలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. శ్రీలంక తీరానికి సమీపంలో 3 కి.మీ ఎత్తువరకు ఉపరితల ఆవర్తనం ఏర్పడినట్లు తెలిపింది. హైదరాబాద్ సహా తెలంగాణ జిల్లాలపై దీని ప్రభావం ఉండే అవకాశం ఉన్నట్లు పేర్కొంది.

ఇప్పటికే భారీ వర్షాలకు భాగ్యనగరం అతలా కుతలమైంది. వరదలు మహానగరాన్ని వణికించాయి. వందలాదిమందిని నిరాశ్రయులు చేశాయి. పదుల సంఖ్యలో ప్రజల ప్రాణాలు కూడా బలితీసుకున్నాయి. వందేళ్ల క్రితం హైదరాబాద్‌లో మూసీ ఉప్పొంగిన నాటి పరిస్థితులు మరోసారి కళ్లకు కట్టిన పరిస్థితులు నెలకొన్నాయి. హైదరాబాద్‌లో వందల సంఖ్యలో కాలనీలు జల దిగ్బంధంలో చిక్కుకుపోయాయి. ఇళ్లలోకి వరద నీరు, బురద చేరి భయానక పరిస్థితులు తలెత్తాయి.

Read More: తెలంగాణలో కరోనా కలకలం.. 1500 దాటుతున్న పాజిటివ్ కేసులు

వరద నీరు ముంచెత్తడంతో ఇళ్లల్లో సామాగ్రి నిత్యవసరాలు వరద నీటిలో కొట్టుకుపోయాయి. దీంతో వాన అంటేనే హైదరాబాద్ జనం భయపడిపోయే పరిస్థితి నెలకొంది. అటు జిల్లాల్లోనూ భారీ వర్షాలకు పలు పంటలు మునిగిపోయాయి. దీంతో ప్రభుత్వం వరద బాధితులకు రూ. 10వేల నష్టపరిహారం ప్రకటించింది. నగరంలో పలు కాలనీలకు చెందిన ప్రజలకు ప్రజాప్రతినిధులు పరమర్శించి చెక్కుల్ని అందించారు.