తెలంగాణలో పలు జిల్లాలకు వర్ష సూచన

ఆగ్నేయ బంగాళాఖాతంలో ఏర్పడిన ఉపరితల ఆవర్తనం ప్రభావంతో తెలంగాణ రాష్ట్రంలోని పలు జిల్లాలకు వర్ష సూచన ఉందని వాతావరణ శాఖ అధికారులు తెలిపారు. ఇవాళ రేపు ఓ మోస్తరు నుంచి భారీ వర్షాలు కురిసే అవకాశం ఉన్నది. కామారెడ్డి, జనగామ, సంగారెడ్డి, మెదక్‌, కుమ్రం భీం ఆసిఫాబాద్‌, జోగుళాంబ గద్వాల, జగిత్యాల, నిర్మల్‌, భద్రాద్రి కొత్తగూడెం జిల్లాల్లో అక్కడక్కడ ఓ మోస్తరు నుంచి భారీ వర్షం కురువొచ్చని హైదరాబాద్‌ వాతావరణ కేంద్రం అధికారులు తెలిపారు.

బుధవారం రాష్ట్రంలో అత్యధికంగా కామారెడ్డి జిల్లా నాగిరెడ్డిపేట్‌లో 11 సెంటీమీటర్ల వర్షపాతం నమోదైనట్టు పేర్కొన్నారు. రుతుపవనా లకుతోడు ఉపరితల ద్రోణి ప్రభావంతో గ్రేటర్‌ హైద రాబాద్‌లో బుధవారం పలుచోట్ల వర్షం కురిసింది. వచ్చే రెండోరోజుల్లో మోస్తరు నుంచి భారీ వానలు పడే అవకాశం ఉందని వాతావరణ శాఖ తెలిపింది. అటు ఏపీలో కూడా రానున్న రెండు రోజుల పాటు వర్షాలు కురుస్తాయని అమరావతి వాతావరణ శాఖ పేర్కొంది.
Read More: కొత్త సచివాలయ డిజైన్‌కు మళ్లీ మార్పులు.. సీఎం కీలక సూచనలు
ఇప్పటికే ఏపీలో పలు ప్రాంతాల్లో వర్షాలు కురుస్తున్నాయి. వాతావరణం కూడా చల్లగా మారింది. తెలంగాణతో పోల్చుకుంటే ఏపీలో వర్షాలు బాగానే పడుతున్నాయి. దక్షిణకోస్తా ఆంధ్రాలోని కొన్నిచోట్ల ఇవాళ, రేపు ఉరుములు, మెరుపులుతో పాటు తేలికపాటి నుండి ఒక మోస్తరు వర్షాలు కురిసే అవకాశాలు కనిపిస్తున్నాయి. తేలికపాటి నుండి ఒక మోస్తరు వర్షాలు మరికొన్నిచోట్ల కురిసే అవకాశం ఉంది. అలాగే అక్కడక్కడ భారీ వర్షాలు కురిసే అవకాశాలు కూడా ఉన్నాయని వాతావరణ శాఖ పేర్కొంది. పలు చోట్ల పిడుగులు పడతాయని హెచ్చరించింది.