హైదరాబాదీలకు గుడ్ న్యూస్! వానలు తగ్గే ఛాన్స్.. కానీ ఈ ప్రాంతాల్లో భారీగా..

పది రోజులుగా వానలు, వరదలతో అవస్థలు పడుతున్న హైదరాబాదీలకు కాస్త ఉపశమనం కలిగించే వార్తను వాతావరణ కేంద్రం అధికారులు చెప్పారు. మధ్య బంగాళాఖాతంలో ఏర్పడిన అల్పపీడనం ప్రస్తుతం పశ్చిమ మధ్య బంగాళాఖాతంలో కేంద్రీకృతమైందని హైదరాబాద్‌ వాతావరణ కేంద్రం ప్రకటించింది. ఇది రాగల 24 గంటల్లో వాయువ్య దిశగా కదిలే అవకాశం ఉందని వాతావరణ కేంద్రం ఉన్నతాధికారి నాగరత్న వెల్లడించారు. దీంతో వచ్చే 24 గంటల పాటు రాష్ట్రంలో తేలికపాటి నుంచి మోస్తరు వర్షాలు పడతాయని, ఒకటి రెండు చోట్ల మాత్రమే భారీ వర్షాలు పడతాయని వెల్లడించారు.

గురువారం నుంచి వర్షాలు తగ్గుముఖం పట్టే అవకాశం ఉన్నందున ప్రజలు ఎలాంటి భయాలు పెట్టుకోవద్దని సూచించారు. అయితే, పశ్చిమ మధ్య బంగాళాఖాతంలోని అల్పపీడన ప్రాంతం మరో 24 గంటల్లో బలపడి వాయుగుండంగా మారుతుందని అమరావతి వాతావరణ కేంద్రం తెలిపింది. ఇది ఉత్తర ఈశాన్య దిశగా కదులుతూ పశ్చిమ బెంగాల్‌-బంగ్లాదేశ్‌ తీరంపై వైపునకు వెళ్లే సూచనలు ఉన్నాయని తెలిపింది. ప్రస్తుతం అల్పపీడన ప్రాంత ప్రభావంతో ఉత్తర కోస్తాంధ్ర, ఒడిశాలలో మోస్తరు నుంచి విస్తారంగా, కొన్నిచోట్ల భారీ నుంచి అతి భారీ వర్షాలు పడే అవకాశం ఉందని అధికారులు తెలిపారు.