సచివాలయం కూల్చివేత: రేవంత్ వేసిన పిటిషన్ మరో బెంచ్‌కు.. సీజేఐ ఆదేశాలు

తెలంగాణలో పాత సచివాలయ భవనాల కూల్చివేత వ్యవహారంపై కాంగ్రెస్ ఎంపీ రేవంత్ రెడ్డి సుప్రీంకోర్టును ఆశ్రయించిన సంగతి తెలిసిందే. ఆ పిటిషన్ గురువారం సుప్రీంకోర్టు ధర్మాసనం ముందుకు విచారణకు వచ్చింది. సచివాలయం కూల్చివేత, నూతన సచివాలయం నిర్మాణంలో పర్యావరణ ఉల్లంఘనలు జరిగాయని కాంగ్రెస్ ఎంపీ రేవంత్‌రెడ్డి ఈ పిటిషన్‌లో పేర్కొన్నారు. అయితే, రేవంత్ రెడ్డి దాఖలు చేసిన ఈ పిటిషన్‌ విచారణ యోగ్యం కాదని సొలిసిటర్ జనరల్ తుషార్ మెహతా వాదించారు.

తెలంగాణ కొత్త సచివాలయం నిర్మాణం చేసుకోవచ్చని జస్టిస్ అశోక్ భూషణ్ నేతృత్వంలోని సుప్రీంకోర్టు ధర్మాసనం ఇప్పటికే తీర్పు ఇచ్చింది. రేవంత్‌రెడ్డి పిటిషన్ తిరస్కరించాలని సొలిసిటర్ జనరల్ న్యాయస్థానాన్ని కోరారు. కేసును జస్టిస్ అశోక్ భూషణ్ ధర్మాసనానికి బదిలీ చేస్తూ ప్రధాన న్యాయమూర్తి ఆదేశాలు జారీ చేశారు.