KCR, సీఎస్‌లను జైల్లో పెట్టండి.. రేవంత్ రెడ్డి సంచలన వ్యాఖ్యలు

పాత సచివాలయ భవనాలతో పాటు ఉన్న మసీదులు, నల్లపోచమ్మ దేవాలయాన్ని కూలగొట్టేందుకు కారణమైన సీఎం కేసీఆర్, ప్రభుత్వ ప్రధాన కార్యదర్శి సోమేష్‌కుమార్‌కు బేడీలు వేసి చర్లపల్లి జైలుకు తరలించాలని కాంగ్రెస్ ఎంపీ రేవంత్‌రెడ్డి డిమాండ్ చేశారు. దేవాలయం కూల్చివేత ఘటనపై కేంద్రమంత్రి కిషన్‌రెడ్డి, బీజేపీ రాష్ట్ర అధ్యక్షుడు బండి సంజయ్ స్పందించాలని డిమాండ్ చేశారు. కేసీఆర్ వేసే మెతుకుల కోసం బీజేపీ నేతలు కక్కుర్తిపడుతున్నారని వ్యాఖ్యానించారు. తెలంగాణ ఉద్యమానికి వేదికైన నల్లపోచమ్మ ఆలయం, మసీదులను కూల్చటాన్ని ఖండిస్తున్నట్లు రేవంత్ రెడ్డి ప్రకటించారు. శుక్రవారం రేవంత్ రెడ్డి మీడియాతో మాట్లాడారు. పర్యావరణాన్ని కాపాడాలని సుప్రీంకోర్టు ఆదేశాలిచ్చినా సీఎస్ సోమేష్ కుమార్ పెడచెవిన పెట్టారని మండిపడ్డారు. టీఆర్ఎస్ ప్రభుత్వం కోర్టులను తప్పుదోవ పట్టిస్తోందని ఆరోపించారు.

తెలంగాణలో శుక్రవారం బ్లాక్ డే అని రేవంత్ రెడ్డి అభివర్ణించారు. సీఎం కేసీఆర్ ఇతర మతాల విశ్వాసాలను, ఆచారాలను దెబ్బతీస్తున్నారని విమర్శించారు. ప్రార్థనా మందిరాలను కూల్చడం ద్వారా ఆయా వర్గాల మనోభావాలను దెబ్బతీశారని వ్యాఖ్యానించారు. 16 మంది ముఖ్యమంత్రులు పాలించిన సెక్రటేరియట్‌ను ఇప్పుడు కూల్చి వేయడం దారుణమని అభిప్రాయపడ్డారు.

undefinedundefined

తన కొడుకు కేటీఆర్‌ను సీఎం చేయడం కోసమే సచివాలయాన్ని కూల్చివేస్తున్నారని రేవంత్ రెడ్డి మండిపడ్డారు. రూ.వందల కోట్ల రూపాయలు వృథా అవుతుందని ఆవేదన వ్యక్తం చేశారు. మంత్రివర్గంలో తుది నిర్ణయం తీసుకోకుండానే, అన్ని రకాల పర్యావరణ అనుమతులు లేకుండానే సచివాలయాన్ని ఎలా కూల్చుతారని రేవంత్ రెడ్డి ప్రశ్నించారు. ట్యాంక్ బండ్, నెక్లెస్ రోడ్ సమీపంలో ఎలాంటి శాశ్వత నిర్మాణాలు చేయవద్దని సుప్రీం కోర్టు తీర్పు ఉందని రేవంత్ గుర్తు చేశారు.

Also Read: undefined