వర్మకు షాకిచ్చిన జీహెచ్ఎంసీ.. ‘పవర్‌స్టార్’ ఎఫెక్ట్!

సినీ దర్శకుడు రాంగోపాల్ వర్మకు జీహెచ్ఎంసీ అధికారులు వరుసగా షాకులిచ్చారు. ‘పవర్‌స్టార్’ సినిమాకు సంబంధించిన పోస్టర్లు అతికించినందుకు గానూ రూ.88 వేలు జరిమానా విధించారు. పవర్‌స్టార్ పోస్టర్లను బహిరంగ ప్రదేశాల్లో అంటించినందుకు జీహెచ్ఎంసీ సెంట్రల్ ఎన్‌ఫోర్స్ టీం రూ. 88 వేలు జరిమానా విధిస్తూ ఈ-చలానా జారీ చేసింది.

ఇటీవల ‘పవర్‌ స్టార్’ సినిమాకు సంబంధించిన పోస్టును ఆర్జీవీ ట్వీట్ చేశారు. ఈ విషయమై ఓ నెటిజన్ సీఈసీ-ఈవీడీఎంకు ఫిర్యాదు చేశారు. స్పందించిన ఎన్‌ఫోర్స్‌మెంట్ టీం జూబ్లీహిల్స్ ప్రాంతంలో అంటించిన రెండు పోస్టర్లకు రూ.4 వేలు ఫైన్ విధించారు. అనుమతులు తీసుకోకుండా అదే ప్రాంతంలో 30కిపైగా పోస్టర్లు అంటించడంతో.. రూ.88 వేలు చలానా విధించారు.

ఆర్జీవీ తీసిన పవర్‌ స్టార్ సినిమా ఈ నెల 25న ఆన్‌లైన్‌లో రిలీజ్ అయిన సంగతి తెలిసిందే. 37 నిమిషాల నిడివి ఉన్న ఈ సినిమాను ఆర్జీవీ వరల్డ్ థియేటర్‌‌లో విడుదల చేశారు. ఈ సినిమాకు పోటీగా పవన్ ఫ్యాన్స్ పరాన్నజీవి మూవీని రిలీజ్ చేశారు.