రైతు బంధు.. అన్నదాతలకు కీలక అప్డేట్

రైతు బంధు నిధుల కోసం ఎదురు చూస్తోన్న తెలంగాణ రైతాంగానికి ముఖ్య అప్‌డేట్. డిసెంబర్ 27 నుంచి రైతు బంధు నిధులను విడుదల చేయనున్నట్లు.. ఇది వరకు ప్రభుత్వం ప్రకటించింది. కానీ 27వ తేదీ ఆదివారం కావడంతో.. సోమవారం నుంచి రైతు బంధు నిధులను అన్నదాతల ఖాతాలో వేసేందుకు ప్రభుత్వం ఏర్పాట్లు చేస్తోంది. ఈ యాసంగి సీజన్లో రైతు బంధు లబ్ధిదారుల సంఖ్య మరో 1.70 లక్షల పెరిగింది.

గత సీజన్లో 57.662 లక్షల మంది పట్టాదారులకు ప్రభుత్వం రైతు బంధు పంపిణీ చేయగా.. కొత్తగా పట్టాదారు పాస్‌బుక్‌లు పొందిన వారిని సైతం తాజాగా రైతు బంధు లబ్ధిదారుల జాబితాలో చేర్చారు. దీంతో రైతు బంధు అందుకునే వారి సంఖ్య పెరిగింది.

యాసంగి సీజన్లో రూ.7300 కోట్ల నిధుల పంపిణీకి ప్రభుత్వం ఏర్పాట్లు చేస్తుండగా.. వ్యవసాయ శాఖ తుది జాబితాను ఇంకా ఖరారు చేయలేదు. రైతు బంధు కింద ఎకరానికి రూ.5 వేల చొప్పున ఏడాదికి రెండుసార్లు తెలంగాణ సర్కారు రైతులకు ఆర్థిక సాయం చేస్తోన్న సంగతి తెలిసిందే.