తెలంగాణ మున్సిపల్ ఎన్నికల వాయిదాకు హైకోర్టులో పిటిషన్

తెలంగాణలో కార్పొరేషన్‌, మున్సిపల్‌ ఎన్నికల వాయిదాకు కోర్టులో పిటిషన్ దాఖలు అయ్యింది. ఎన్నికలను వాయిదా వేయాలని కాంగ్రెస్‌ సీనియర్‌ నాయకుడు షబ్బీర్ అలీ హైకోర్టులో పిటిషన్‌ వేశారు. రాష్ట్రంలో కరోనా తీవ్రతను దృష్టిలో ఉంచుకొని ఎన్నికల వాయిదా వేయాలంటూ ఆయన లంచ్‌మోషన్‌ పిటిషన్‌ దాఖలు చేశారు. దీనిపై ఈ మధ్యాహ్నం 2.30 గంటలకు న్యాయస్థానంలో విచారణ జరిగే అవకాశం ఉంది.

ఓ వైపు నాగార్జున సాగర్ ఉపఎన్నిక జరుగుతుండగానే..మున్సిపల్ ఎన్నికల నోటిఫికేషన్ విడుదలైంది. రాష్ట్రంలో 2 కార్పొరేషన్లు, 5 మున్సిపాలిటీలకు ఎన్నికల నోటిఫికేషన్ విడుదల అయ్యింది. వరంగల్ , ఖమ్మం కార్పొరేషన్లు, అచ్చంపేట, సిద్దిపేట, నకిరేకల్, జడ్చర్ల, కొత్తూరు మున్సిపాలిటీలకు ఎన్నికలు జరగాల్సి ఉన్నాయి.

ఈ ఎన్నికలకు సంబంధించిన రేపటి నుంచి అంటే ఏప్రిల్ 16 నుంచి 18 వ తేదీ వరకూ నామినేషన్ల స్వీకరణ ఉంటుంది. ఈ నెల 22 వ తేదీ నామినేషన్ల ఉపసంహరణ జరగనుంది. ఏప్రిల్ 30 న పోలింగ్ జరగనుంది. మే 3న అంటే అసెంబ్లీ ఎన్నికల ఫలితాలు వెలువడిన మరుసటి రోజున మున్సిపాలిటీ, కార్పొరేషన్ల ఫలితాలు వెలువడనున్నాయి.