బాయ్‌ఫ్రెండ్‌తో చాటింగ్ చేస్తూ భవనం పైనుంచి పడి యువతి మృతి

మూడంతస్తుల భవనం పైనుంచి పడి ఓ యువతి దుర్మరణం పాలైన ఘటన హైదరాబాద్ శివార్లలోని శంషాబాద్ మండల కేంద్రంలో జరిగింది. బాయ్ ఫ్రెండ్‌తో ఫోన్లో చాటింగ్ చేస్తూ ప్రమాదవశాత్తూ భవంతి పైనుంచి కింద పడినట్లు తెలుస్తోంది. మంగళవారం (జనవరి 14) సాయంత్రం 5 గంటలకు ఈ ఘటన చోటు చేసుకుంది. మృతురాలిని కర్ణాటక రాష్ట్రం బాగల్కోట్ జిల్లా ముధోల్‌ టౌన్‌ విద్యాగిరినగర్‌కు చెందిన సిమ్రాన్‌ (22)గా పోలీసులు గుర్తించారు.

ప్రాథమికంగా అందిన వివరాల ప్రకారం.. కర్ణాటకు చెందిన యువతి.. శంషాబాద్ ఎయిర్‌పోర్టులో కస్టమర్ సర్వీసెస్‌లో విధులు నిర్వహిస్తూ స్థానికంగా నివాసం ఉంటోంది. మంగళవారం సాయంత్రం ఆమె తాను అద్దెకు ఉంటున్న భవంతి మిద్దె పైకి చేరుకొని ఫోన్లో మాట్లాడుతోంది. ఆ తర్వాత కాసేపటికే భవంతి పైనుంచి కిందపడిపోయింది.

Must Read: ఫేస్‌బుక్ పరిచయం.. వివాహితను ట్రాప్ చేసి..

తలకు తీవ్రమైన గాయం కావడంతో యువతి అక్కడికక్కడే మృతి చెందింది. ఈ ఘటన స్థానికంగా కలకలం రేపింది. భవంతి పైనుంచి యువతి ఒక్కసారిగా కిందపడి మృతి చెందడాన్ని ప్రత్యక్షంగా చూసిన కొంత మంది భయాందోళలకు గురయ్యారు.

సమాచారం అందుకున్న పోలీసులు సంఘటనా స్థలానికి చేరుకొని పరిశీలించారు. యువతి మృతదేహాన్ని మార్చురీకి తరలించారు. కుటుంబ సభ్యులకు సమాచారం ఇచ్చారు. కేసు నమోదు చేసుకుని దర్యాప్తు చేపట్టారు.

Also Read: పోలీసులపైకి దూసుకెళ్లిన కారు.. ఎన్నికల తనిఖీల్లో విషాదం