భారీ అవినీతితో పట్టుబడ్డ పోలీస్.. అరెస్టు చేసిన ఏసీబీ

ఆదాయానికి మించి ఆస్తులు ఉన్నాయనే ఆరోపణలతో రెండు రోజుల పాటు సిద్దిపేట అదనపు ఎస్పీ నర్సింహ రెడ్డి ఇల్లు, బంధువులు, బినామీల ఇళ్లలో ఏసీబీ అధికారులు దాడులు నిర్వహించిన సంగతి తెలిసిందే. సిద్దిపేటతోపాటు, హైదరాబాద్, మహబూబ్ నగర్, జహీరాబాద్, షాద్‌నగర్ ప్రాంతాల్లో ఏసీబీ అధికారులు ఏకకాలంలో సోదాలు నిర్వహించారు.

అయితే, ఈ సోదాల్లో నర్సింహ రెడ్డిపై వచ్చిన ఆరోపణలు నిజమే అని తేలింది. అధికారులు జరిపిన దాడుల్లో కిలోన్నర బంగారం, రూ5.3 లక్షల నగదు, రూ.6 లక్షల బ్యాంక్ బ్యాలెన్స్, గోల్కొండలో విల్లాతో పాటు, శంకర్ పల్లిలో 14 ప్లాట్లు, సిద్దిపేట, మహబూబ్ నగర్‌లలో 20 ఎకరాల భూమి ఉన్నట్లు అధికారులు గుర్తించారు. ఇతనికి చెందిన రెండు కార్లను సైతం ఏసీబీ అధికారులు స్వాధీనం చేసుకున్నారు.

అడిషనల్ ఎస్పీ నర్సింహ రెడ్డి 5 కోట్లకు పైగా అక్రమ ఆస్తులను సంపాదించినట్లు ఏసీబీ అధికారులు గుర్తించారు. ఈ మేరకు అతణ్ని అరెస్టు చేసి, కోర్టులో హాజరు పరిచారు. అనంతరం ఏసీబీ అధికారులు రిమాండ్‌కు తరలించారు. అయితే, తనపై కుట్రలో భాగంగానే ఈ దాడులు జరిగాయని నర్సింహరెడ్డి వివరణ ఇచ్చారు. తాను చాలా నిజాయతీపరుడినని సమర్థించుకున్నారు.