సిరిసిల్ల ఎస్పీ సరికొత్త ప్రయోగం.. ప్రజలతో ముఖాముఖీ, కేసుల పరిష్కారం

తెలంగాణలో తొలిసారిగా ఓ జిల్లా ఎస్పీ వినూత్న ప్రయోగానికి తెర తీశారు. తన బృందంలోని పోలీస్ అధికారులందరితో కలిసి స్వయంగా తానే జిల్లా ప్రజలతో ముఖాముఖీ కార్యక్రమం ప్రారంభించనున్నారు. సిరిసిల్ల జిల్లా ఎస్పీ రాహుల్ హెగ్డే ఈ సరికొత్త ప్రయోగానికి తెర తీశారు. దీని ద్వారా జిల్లాలో ఎవరికైనా చట్టపరమైన సమస్యలు ఉన్నా, ఏవైనా కేసుల్లో ఇబ్బంది ఎదుర్కొంటున్నా స్వయంగా తెలుసుకోనున్నారు. వచ్చే మంగళవారం (సెప్టెంబర్ 24) జిల్లా ఎస్పీ కార్యాలయంలో తనను వ్యక్తిగతంగా సంప్రదించవచ్చని తెలిపారు.

ఆ రోజు జిల్లా పోలీసు ఉన్నతాధికారులందరూ ఎస్పీ కార్యాలయంలో అందుబాటులో ఉంటారని, బాధితులకు సంబంధించిన సమస్యను సంబంధిత స్టేషన్ పరిధిలోని ఎస్.హెచ్.ఓ. సమక్షంలో అక్కడికక్కడే పరిష్కారం చేయటానికి ప్రయత్నిస్తామని ఎస్పీ రాహుల్ హెగ్డే చెప్పారు. ప్రజలందరూ ఈ అవకాశాన్ని సద్వినియోగం చేసుకొని తమ సమస్యలను పరిష్కరించుకోవచ్చని సూచించారు.

Must Read: టిక్ టాక్‌తో అదరగొడుతున్న అత్త.. పరువు పోతోందంటున్న అల్లుడు

ప్రతి పోలీస్ స్టేషన్ ఎస్.హెచ్.ఓ. జిల్లా ఎస్పీ కార్యాలయంలో ప్రజలకు అందుబాటులో ఉండి ప్రజల సమస్యలను, వినతులను స్వీకరించి వాటిని అక్కడిక్కడే పరిష్కరించే ప్రయత్నం చేయటమే ఈ కార్యక్రమ ముఖ్య ఉద్దేశమని ఎస్పీ రాహుల్ హెగ్డే తెలిపారు. చట్టపరమైన, భద్రతాపరమైన సమస్యలు ఏవైనా ఉంటే నిర్భయంగా తమతో చెప్పుకోవచ్చని స్పష్టం చేశారు.