రాకెట్ ఇంజిన్‌ను నింగిలోకి పంపిన హైదరాబాద్ సంస్థ.. దేశంలో తొలి ప్రయివేట్ కంపెనీ!

హైదరాబాద్‌ నగరానికి చెందిన స్కైరూట్ ఏరోస్పేస్ అనే స్టార్టప్ అప్పర్ స్టేజీ రాకెట్‌ ఇంజిన్‌ను విజయవంతంగా పరీక్షించింది. దేశంలో ఈ ఘనత సాధించిన తొలి ప్రయివేట్ కంపెనీ ఇది కావడం విశేషం. నోబెల్ పురస్కార గ్రహీత సీవీ రామన్ పేరిట ఈ 3-డీ ప్రింటెడ్ రాకెట్ ఇంజిన్‌కు రామన్ అని పేరు పెట్టారు. సంప్రదాయ రాకెట్ ఇంజిన్లతో పోలిస్తే ఇది సగం కంటే తక్కువ బరువు ఉంటుంది కానీ సామర్థ్యం మాత్రం ఒకేలా ఉంటుంది.

ఈ రాకెట్ ద్వారా ఒకేసారి అనేక ఉపగ్రహాలను వేర్వేరు కక్ష్యల్లోకి ప్రవేశపెట్టే వీలుంది. వచ్చే ఆరు నెలల్లో రామన్ ఇంజిన్‌ను మరిన్నిసార్లు పరీక్షిస్తామని స్కేరూట్ సంస్థ తెలిపింది. ఇస్రోలో శాస్త్రవేత్తలుగా పని చేసిన పవన్ కుమార్ చందనా, నాగ భరత్ డాక అనే ఇద్దరు స్కైరూట్ సంస్థను ఏర్పాటు చేశారు. తమ రాకెట్ ద్వారా 2021 చివరి నాటికి 250-700 కిలోల బరువున్న ఉపగ్రహాన్ని భూమి దిగువ కక్ష్యలోకి ప్రవేశపెట్టాలని ఈ సంస్థ భావిస్తోంది.

దేశంలో తొలి 3-డీ బై ప్రొపెల్లెంట్ లిక్విడ్ రాకెట్ ఇంజిన్ ఇంజెక్టర్‌ను రూపొందించాం. సంప్రదాయ ఇంజిన్లతో పోలిస్తే దీని బరువు 50 శాతం తక్కువగా ఉంటుందని చందనా తెలిపారు. రాకెట్ల అభివృద్ధి కోసంం ఈ సంస్థ రూ.31.5 కోట్ల నిధులను సమీకరించింది. 2021 తొలి అర్ధభాగం ముగిసే నాటికి రూ. 90 కోట్లు సమీకరించేందుకు చర్చలు జరుపుతోంది.

పీఎస్ఎల్వీ రాకెట్ల ద్వారా తేలికపాటి ఉపగ్రహాలను ప్రయోగించడంలో భారత్ ముందుంది. అంతరిక్ష రంగంలోకి ప్రయివేట్ కంపెనీలకు కేంద్రం ఆహ్వానించింది. దీంతో స్కైరూట్, అగ్నికుల్, బెల్లాట్రిక్స్ లాంటి స్టార్టప్‌లు చిన్నపాటి లాంచర్లు, 3-డీ ప్రింటెడ్ ఇంజిన్లను రూపొందిస్తున్నాయి. వీటి ప్రవేశంతో ఉపగ్రహ ప్రయోగానికయ్యే వ్యయం తగ్గుతుందని భావిస్తున్నారు. వచ్చే పదేళ్లలో పది వేల చిన్న ఉపగ్రహాలను ప్రపంచ వ్యాప్తంగా ప్రయోగిస్తారని అంచనా.