అలా చేయలేకపోతే ఇంట్లో కూర్చోండి: విపక్షాలపై మంత్రి తలసాని ఫైర్

కరోనా విషయంలో ప్రభుత్వం తీరుపై విమర్శలు చేస్తున్న విపక్ష నేతలకు మంత్రి తలసాని శ్రీనివాస్ యాదవ్ గట్టి కౌంటర్ ఇచ్చారు. ఇలాంటి విపత్కర సమయంలో చేతనైతే సాయం చేయాలని, లేకపోతే ఇంట్లో కూర్చోవాలని సలహా ఇచ్చారు. కరోనా కట్టడిపై జీహెచ్ఎంసీలో సోమవారం జరిగిన మంత్రుల సమావేశంలో ఆయన పాల్గొన్నారు. ఈ సందర్భంగా ఆయన మాట్లాడుతూ.. రాష్ట్రవ్యాప్తంగా ఇంటింటి సర్వే జరుగుతోందని, ఇప్పటివరకు 9లక్షల మందికి పరీక్షలు చేశామని తెలిపారు.స్వచ్ఛంద కార్యక్రమాలు చేపట్టేవారు ప్రభుత్వం ఇచ్చిన గడువు సమయంలోనే నిర్వహించుకోవాలని మంత్రి తలసాని సూచించారు. కరోనా రోగులతో పాటు వచ్చేవారికి ఇబ్బంది కలగకుండా అన్ని ప్రభుత్వ ఆస్పత్రుల వద్ద అన్నపూర్ణ కేంద్రాలు ఏర్పాటు చేసినట్లు తెలిపారు. ఏపీ నుంచి వచ్చే అంబులెన్స్‌‌లు ఆపే విషయాన్ని కొందరు దురుద్దేశంతో రాజకీయం చేయడం సమంజసం కాదన్నారు. హైదరాబాద్‌లో బెడ్స్ ఖాళీ లేవన్న కారణంతోనే అంబులెన్స్‌ను ఆపాల్సి వచ్చిందని, బెడ్స్‌ ఖాళీ ఉంటే ఎవరైనా సిటీకి వచ్చి ట్రీట్‌మెంట్ చేయించుకోవచ్చని పేర్కొన్నారు.