తమిళిసైకి సొంత కారు కూడా లేదు, ఆమె కూతురికి మాత్రం.. ఎన్నికల అఫిడవిట్‌లో ఇంట్రెస్టింగ్ విషయాలు

Tamilisai Soundararajan Elections Affidavit: తెలంగాణ మాజీ గవర్నర్ తమిళిసై సౌందర రాజన్.. తమిళనాడు లోక్ సభ ఎన్నికల్లో పోటీ చేస్తున్న విషయం తెలిసిందే. అయితే.. చెన్నై సౌత్ నియోజకవర్గం నుంచి బీజేపీ అభ్యర్థిగా బరిలో దిగుతున్నారు. కాగా.. తమిళనాడులో తొలిదశ పోలింగ్‌కు ఇప్పటికే నోటిఫికేషన్ విడుదలవటంతో.. అభ్యర్థులు నామినేషన్లు దాఖలు చేస్తున్నారు. ఈ క్రమంలోనే.. తమిళిసై సౌందర రాజన్ కూడా నామపత్రాలు సమర్పించారు. ఈ సందర్భంగా.. ఆమె అఫిడవిట్‌లో తన ఆస్తుల వివరాలను సౌందర రాజన్ ప్రకటించటంతో.. అవి కాస్త ఇప్పుడు వైరల్ అవుతున్నాయి.

అయితే.. తమిళిసై సౌందర రాజన్ పేరు మీద ఉన్న మొత్తం ఆస్తులు రూ. 2.17 కోట్లు కాగా.. ప్రస్తుతం ఆమె ఖాతాలో కేవలం 50 వేల నగదు మాత్రమే ఉన్నట్టు అఫిడవిట్‌లో పేర్కొన్నారు. ఇక.. కోటి 57 లక్షల విలువ చేసే చరస్తులు ఉన్నట్టు తెలిపారు. ఇదంతా ఒక ఎత్తయితే.. తన పేరు మీద ఒక్క కారు కూడా లేదని పేర్కొనటం ఆసక్తికరం. మరోవైపు.. తన భర్త పేరు మీద 3.92 కోట్ల విలువైన చరాస్తులున్నాయని, కుమార్తెకు కోటి రూపాయల విలువైన ఆస్తులు ఉన్నట్టు తెలిపారు. కాగా.. ఆమె పేరు మీద 4 కార్లు ఉన్నట్టు అఫిడవిట్‌లో తమిళిసై సౌందర రాజన్ వెల్లడించారు.

అయితే.. తెలంగాణ గవర్నర్‌ పదవికి, పుదుచ్చేరి లెఫ్టినెంట్ గవర్నర్ పదవికి ఇటీవలే ఆమె రాజీనామా చేసిన విషయం తెలిసిందే. తెలంగాణ బీజేపీ స్టేట్ చీఫ్ కిషన్ రెడ్డి, తమిళనాడు స్టేట్ చీఫ్ అన్నమలై ఆధ్వర్యంలో మళ్లీ బీజేపీలో చేరగా.. ఆమెకు చెన్నై సౌత్ నియోజకవర్గ టికెట్ ఇచ్చింది అధిష్ఠానం.