పెంచిన తల్లిని హత్య చేసిన యువకుడు స్నేహితుడి చేతిలో హతం

నల్లమల్ల అభయారణ్యం నాగర్ కర్నూల్ జిల్లా అమ్రాబాద్ మండలం మల్లెలతీర్థం జలపాతం వద్ద వ్యక్తిని చంపిన ఘటన కలకలం రేపింది. స్థానిక ఎస్ఐ తెలిపిన వివరాల ప్రకారం.. హైదరాబాద్‌కు చెందిన సాయి తేజ అనే యువకుడు వ్యసనాలకు బానిసై.. తనను పెంచిన తల్లి భులక్ష్మిని ఈ నెల 6వ తేదీన అతికిరాతకంగా హతమార్చాడు. ఇంట్లో బంగారం, డబ్బులు తీసుకుని స్నేహితుడు వట్టికోట శివతో కలిసి ఈ నెల 10న శ్రీశైలం వెళ్లాడు. తిరిగి వచ్చే క్రమంలో వారిద్దరూ నాగర్ కర్నూల్ జిల్లా అమ్రాబాద్ మండల పరిధిలోని మల్లెలతీర్థం జలపాతానికి వెళ్లి అక్కడ మద్యం సేవించారు.

మద్యం మత్తులో ఉన్న స్నేహితుల మధ్య జరిగిన ఘర్షణలో సాయితేజను శివ హత్య చేశాడు. అనంతరం కాళ్లు, చేతులు కట్టేసి మృతదేహాన్ని లగేజ్ బ్యాగులో పెట్టి.. అందులో రాళ్లు నింపి జలపాతం ఎదురుగా ఉన్న కుంటలో పడేశాడు. ఆ తర్వాత హైదరాబాద్‌కు సరూర్ నగర్ పోలీస్ స్టేషన్‌లో లొంగిపోయాడు. కేసు నమోదు చేసుకున్న పోలీసులు నిందితుడి వివరాల మేరకు అమ్రాబాద్ పోలీసులు, ఫారెస్ట్ అధికారుల సహకారంతో సంఘటన స్థలానికి చేరుకుని సాయితేజ మృతదేహాన్ని వెలికితీశారు. ఈ దర్యాప్తులో సరూర్ నగర్ పోలీసులు, అమ్రాబాద్ పోలీసులు ఫారెస్ట్ అధికారులు పాల్గొన్నారు

తల్లిని హత్య చేశాడు ఇలా..

సరూర్ నగర్ పీటీకాలనీలో నివాసం ఉండే భూదేవి (58) అనే మహిళ సాయితేజను దత్తత తీసుకుని పెంచి పెద్ద చేసింది. తన కడుపున పుట్టకపోయినా.. అతడిని ఎంతో ప్రేమగా చూసుకుంది. అయితే బుద్ధి మాంద్యం ఉన్న సాయితేజ స్నేహితుల కారణంగా మద్యానికి బానిసై.. డబ్బులు ఇవ్వాలని తల్లిని వేధించేవాడు. అందుకు ఆమె నిరాకరించడంతో ఇంట్లో ఉన్న బంగారంపై కన్నేశాడు. బీరువా నుంచి బంగారం చోరీ చేస్తున్న సమయంలో తల్లి నిద్ర లేవడంతో ఆమెను హత్య చేశాడు. అనంతరం ఇంట్లో ఉన్న 30 తులాల నగలు, నగదు తీసుకెళ్లి స్నేహితులకు ఇచ్చాడు. ఈ ఘటన జరిగిన వారం రోజుల వ్యవధిలోనే సాయితేజ స్నేహితుడు శివ చేతిలో హత్యకు గురయ్యాడు.