తెలంగాణ అసెంబ్లీ శనివారానికి వాయిదా

సీఎం కేసీఆర్ బడ్జెట్ ప్రసంగం అనంతరం తెలంగాణ శాసనసభ వాయిదా పడింది. శాసనసభను శనివారానికి (సెప్టెంబర్ 14) వాయిదా వేస్తున్నట్లు స్పీకరం పోచారం శ్రీనివాస రెడ్డి ప్రకటించారు. తెలంగాణ ప్రభుత్వం అసెంబ్లీలో సోమవారం 2019-20 సంవత్సరానికి పూర్తి స్థాయి వార్షిక బడ్జెట్‌ను ప్రవేశపెట్టిన విషయం తెలిసిందే.

రూ. 1,46,492.3 కోట్లతో తెలంగాణ బడ్జెట్‌ను ప్రవేశపెట్టారు. దేశవ్యాప్తంగా పలు రంగాలపై ఆర్థిక మాంద్యం ప్రభావం తీవ్రంగా ఉందని సీఎం కేసీఆర్ పేర్కొన్నారు. ఇలాంటి తరుణంలో తెలంగాణ రాష్ట్రం పురోగతి సాధించిందని తెలిపారు. ఆర్థిక మాంద్యం నేపథ్యంలో ఆచితూచి కేటాయింపులు చేసినట్లు, ఖర్చులపై మంత్రులు, అధికారులకు స్పష్టమైన దిశానిర్దేశం చేసినట్లు వెల్లడించారు.

Also Read: సీఎం కేసీఆర్ బడ్జెట్ ప్రసంగం..

విపత్కర పరిస్థితుల్లోనూ కీలకమైన పథకాలు కొనసాగించడానికే తెలంగాణ ప్రభుత్వం నిర్ణయం తీసుకుందని సీఎం కేసీఆర్ తెలిపారు. రైతు బంధు, రైతు బీమా, పంట రుణాల మాఫీ తదితర ఫతకాలకు కేటాయింపులు ప్రకటించారు. సోమవారం ఉదయం 11:30 గంటలకు బడ్జెట్‌ సమావేశాలు ప్రారంభమయ్యాయి. ముఖ్యమంత్రి కేసీఆర్‌ శాసనసభలో బడ్జెట్‌ను ప్రవేశపెట్టి ప్రసంగించారు. సుమారు 40 నిమిషాల పాటు సీఎం కేసీఆర్‌ బడ్జెట్‌ ప్రసంగాన్ని చదివారు. బడ్జెట్‌ ప్రసంగం ముగిసిన వెంటనే సభను శనివారానికి వాయిదా వేస్తున్నట్లు స్పీకర్‌ పోచారం ప్రకటించారు.