సీఏఏకు వ్యతిరేకంగా తీర్మానం చేసిన తెలంగాణ అసెంబ్లీ

కేంద్ర ప్రభుత్వం తీసుకొచ్చిన పౌరసత్వ సవరణ చట్టం (సీఏఏ)ను వ్యతిరేకిస్తూ తెలంగాణ శాసనసభ తీర్మానానికి ఆమోదం తెలిపింది. సీఏఏకు వ్యతిరేకంగా రాష్ట్ర ప్రభుత్వం ప్రవేశపెట్టిన తీర్మానంపై చర్చ అనంతరం శాసనసభ ఏకగ్రీవంగా ఆమోదించింది. సోమవారం (మార్చి 16) ఉదయం అసెంబ్లీ ప్రారంభమైన వెంటనే సీఎం కేసీఆర్.. సీఏఏపై తీర్మానం ప్రవేశపెట్టి చర్చను ప్రారంభించారు. అనంతరం అన్ని పార్టీల నేతలూ ఈ తీర్మానంపై మాట్లాడారు.

బీజేపీ ఎమ్మెల్యే రాజాసింగ్.. సీఏఏపై తెలంగాణ ప్రభుత్వ తీరును తప్పుబట్టారు. అసెంబ్లీలో సీఏఏ ప్రతులను చించివేసి తన నిరసన వ్యక్తం చేశారు. మరోవైపు.. సీఏఏకు వ్యతిరేకంగా తెలంగాణ ప్రభుత్వం తీర్మానం ప్రవేశపెట్టడాన్ని కాంగ్రెస్ శాసనసభా పక్షనేత భట్టి విక్రమార్క స్వాగతించారు. ఎంఐఎం ఎమ్మెల్యే అక్బరుద్దీన్ ఓవైసీ ఈ అంశంపై మాట్లాడుతూ.. కేసీఆర్ సర్కార్‌పై ప్రశంసలు కురిపించారు.

సీఏఏ చట్టం దేశవ్యాప్తంగా అనుమానాలకు, ఆందోళనలకు తావిస్తోందని సీఎం కేసీఆర్ పేర్కొన్నారు. లౌకిక, ప్రజాస్వామ్యవాదులు సీఏఏపై తమ తమ పద్ధతుల్లో నిరసన వ్యక్తం చేస్తున్నారని గుర్తు చేశారు. సీఏఏ చట్టం రాజ్యాంగానికి వ్యతిరేకంగా ఉందని అభిప్రాయపడ్డారు. ఈ చట్టంపై కేంద్ర ప్రభుత్వం పునఃసమీక్షించుకోవాలని సూచించారు.

‘స్పష్టమైన అవగాహనతోనే సీఏఏ, ఎన్‌ఆర్‌సీని వ్యతిరేకిస్తున్నాం. కేంద్రం తీసుకున్న నిర్ణయంపై పున:సమీక్ష చేసుకోవాలి. కొత్త ప్రతిపాదనతో ముందుకు వస్తే మద్దతు ఇచ్చే అంశంపై ఆలోచిస్తాం’ అని కేసీఆర్ పేర్కొన్నారు. దేశంలో ఇప్పటికే ఏడు రాష్ట్రాలు (కేరళ, పంజాబ్‌, పశ్చిమ బెంగాల్‌, రాజస్థాన్‌, ఛత్తీస్‌గఢ్‌, ఢిల్లీ, మధ్యప్రదేశ్‌) సీఏఏకు వ్యతిరేకంగా తీర్మానం చేశాయని, తమది ఎనిమిదో రాష్ట్రమని ముఖ్యమంత్రి తెలిపారు. కేంద్ర ప్రభుత్వ నిర్ణయాలకు అంశాల వారిగా మద్దతు ఉంటుందని చెప్పారు. జమ్ము కశ్మీర్‌కు సంబంధించిన ఆర్టికల్ 370 రద్దు అంశంలో కేంద్ర ప్రభుత్వ నిర్ణయాన్ని మొట్టమొదట సమర్థించింది తామేనని సీఎం కేసీఆర్ గుర్తుచేశారు.

Also Read: కేసీఆర్‌ ఉన్న గడ్డ మీద పుట్టడం నా అదృష్టం..