టచ్‌లో 25 మంది.. బాంబు పేల్చిన బీజేపీ ఇన్‌చార్జి, ఆట మొదలైందా?

దుబ్బాక విజయంతో రేసులో స్పీడు పెంచిన బీజేపీ.. జీహెచ్‌ఎంసీ ఎన్నికల్లో ఓడించినంత పనిచేసి అధికార టీఆర్‌ఎస్‌కి దిమ్మతిరిగే షాకిచ్చింది. సాగర్‌లో వెనకపడినా సీనియర్ నేత జానా రెడ్డి ఖాతాలో పడిపోయింది. తాజాగా హుజూరాబాద్‌లో ఘన విజయంతో కమలం పార్టీ జోరుమీదుంది. బీజేపీ రాష్ట్ర అధ్యక్షుడ బండి సంజయ్, హుజూరాబాద్ నుంచి గెలిచి సత్తాచాటిన ఈటల రాజేందర్ కమలానికి అప్రకటిత స్టార్ క్యాంపెయినర్లుగా మారారు. రాష్ట్రంలో ప్రజా సమస్యలను హైలైట్ చేస్తూ ఎప్పటికప్పుడు జనంలోకి దూసుకెళ్లేలా ముందుకెళ్తున్నారు.

అటు అధిష్టానం ఆశీస్సులు కూడా మెండుగానే ఉన్నట్లు తెలుస్తోంది. కేంద్రం మెడలు వంచుతామంటూ బీరాలు పలికిన కేసీఆర్ ప్రధానిని కలవకుండానే వెనుదిరిగి రావడం కూడా రాష్ట్ర బీజేపీకి కలిసొచ్చింది. మరోవైపు ఎమ్మెల్సీ ఎన్నికల్లో కారు ఓవర్ లోడ్ కారణంగా అధికారపార్టీలో అసమ్మతి సెగలు రేగుతున్నాయి. ఇప్పటికే మహబూబ్‌నగర్‌కి చెందిన సాయిచంద్, నిజామాబాద్ నుంచి ఆకుల లలిత, కరీంనగర్ నుంచి రవీందర్ సింగ్ వంటి నేతలు చివరివరకూ అవకాశం దక్కుతుందని ఎదురుచూసి నిరాశకు గురయ్యారు.

సరిగ్గా ఇదే సమయంలో మరో బాంబు పేల్చారు బీజేపీ తెలంగాణ ఇన్‌చార్జి తరుణ్ చుగ్. తమతో 25 మంది నేతలు టచ్‌లో ఉన్నారంటూ సంచలన వ్యాఖ్యలు చేశారు. కాంగ్రెస్, టీఆర్‌ఎస్ నుంచి నేతలు టచ్‌లో ఉన్నారని ఆయన అన్నారు. కేసీఆర్‌కి ఢిల్లీలో షాక్ తగిలిందన్నారు. ఇప్పటికిప్పుడు ఎన్నికలు వచ్చినా కేసీఆర్‌కి 60 మంది అభ్యర్థులు కూడా దొరకరంటూ ఆసక్తికర వ్యాఖ్యలు చేశారు. రాష్ట్రంలో ఎప్పుడు ఎన్నికలు వచ్చినా బీజేపీకి 80 సీట్లు ఖాయమని ఆయన ధీమా వ్యక్తం చేశారు.

Also Read: