తెలంగాణ కేబినెట్ భేటీ ప్రారంభం.. ఈ అంశాలపై కీలక నిర్ణయాలు!

రాష్ట్ర మంత్రివర్గ సమావేశం ప్రారంభమైంది. ప్రగతి భవన్‌లో ముఖ్యమంత్రి కేసీఆర్‌ అధ్యక్షతన జరుగుతున్న ఈ సమావేశంలో కొత్త సచివాలయ నిర్మాణం, నియంత్రిత సాగు, కరోనా కట్టడి చర్యలు, కరోనా వైరస్ వ్యాప్తి, ఈ సమయంలో విద్యారంగంలో చేపట్టాల్సిన చర్యలు వంటి వాటిపై ప్రధానంగా చర్చకు రానున్నాయి. అంతేకాక, ఏపీ, తెలంగాణ మధ్య కృష్ణా జలాల అంశం, ఫుడ్‌ ప్రాసెసింగ్‌, ఎలక్ట్రిక్‌ వాహనాల పాలసీ, రిటైల్‌ ట్రేడ్‌, లాజిస్టిక్‌ విధానంపైనా చర్చిస్తున్నట్లు తెలుస్తోంది. ఈ కేబినెట్ సమావేశానికి ప్రభుత్వ ప్రధాన కార్యదర్శి సోమేశ్‌ కుమార్‌‌తో పాటు సంబంధిత శాఖల ముఖ్య కార్యదర్శులు హాజరయ్యారు.

కొత్త సచివాలయ భవనం తుది డిజైన్‌కు మంత్రివర్గం ఆమోదముద్ర వేసే అవకాశం ఉంది. ఇటీవల తరచూ సీఎం కేసీఆర్ సచివాలయ నమూనాకు సంబంధించిన డిజైన్‌పై ఆర్కిటెక్ట్‌లు, ప్రభుత్వ ఉన్నతాధికారులతో సమీక్ష నిర్వహించిన సంగతి తెలిసిందే. చెన్నైకి చెందిన ఆస్కార్ అండ్ పొన్ని సంస్థ రూపొందించిన సచివాలయం డిజైన్లలో సీఎం కీలక మార్పులు సూచించారు. ఈ డిజైన్లకు ఆర్కిటెక్టులు తుది మెరుగులు దిద్ది ఫైనల్ నమూనాను రూపొందించనట్లు సమాచారం. సచివాలయం కొత్త డిజైన్లకు ఆమోదం తెలపడం సహా టెండర్ల నిర్వహణ, నిర్మాణ పనుల బడ్జెట్‌కు రాష్ట్ర కేబినెట్ ఆమోదం తెలపనుంది.

కరోనా నేపథ్యంలో విద్యాసంస్థలను తెరిచే విషయంపై కూడా కేబినెట్‌లో చర్చించనున్నారు. ఈ నెలాఖరు దాకా స్కూళ్లు, కాలేజీలు తెరవకూడదని కేంద్రం తెలిపిన వేళ.. సెప్టెంబర్ మాసంలో వీటిని తెరవాల్సి వస్తే ఏ రకమైన పద్ధతులను అవలంబించాలనే దానిపైనా సమావేశంలో చర్చించనున్నట్లు సమాచారం. డిజిటల్ విధానాన్ని ప్రోత్సహించే దిశగా ప్రభుత్వం నిర్ణయం తీసుకొనే అవకాశం ఉంది. నీటి పారుదల శాఖలో ఖాళీగా ఉన్న పోస్టులను భర్తీ చేయడంపైనా కేబినెట్ నిర్ణయం తీసుకొనే అవకాశం ఉంది.