కరోనాతో అల్లాడుతుంటే కొత్త సచివాలయం అవసరమా?: కాంగ్రెస్

రాష్ట్రంలో కరోనా వైరస్‌‌ వ్యాప్తి వేగంగా జరుగుతుంటే, దాన్ని అరికట్టాల్సింది పోయి సచివాలయం కూల్చివేయాల్సిన అవసరం ఏమొచ్చిందని తెలంగాణ కాంగ్రెస్ పార్టీ ప్రశ్నించింది. సీఎం కేసీఆర్‌కి ప్రజల సమస్యల కంటే తన మొండి పట్టే అధిక ప్రాధాన్యంగా ఉందని టీపీసీసీ అధ్యక్షుడు ఉత్తమ్ కుమార్ రెడ్డి విమర్శించారు. ఈయన మాజీ మంత్రి దుద్దిళ్ల శ్రీధర్‌బాబుతో కలిసి మంగళవారం ఓ ప్రకటన విడుదల చేశారు. ఉద్యోగులకు పూర్తిగా జీతాలు కూడా ఇవ్వలేని స్థితిలో ప్రభుత్వం ఉండగా, ఇప్పుడు కొత్త సచివాలయం అవసరమా అని ప్రశ్నించారు. ముందు రైతులకు రుణమాఫీ చేయాలని, తర్వాత కొత్త సచివాలయం గురించి ఆలోచించాలని హితవు పలికారు.

తెలంగాణలో కరోనా కేసులు నానాటికీ రెట్టింపవుతూ ఉంటే సీఎం కేసీఆర్ కనీసం సమీక్ష కూడా నిర్వహించకుండా ఫాంహౌస్‌లోకి వెళ్లిపోయారని ఉత్తమ్ ఎద్దేవా చేశారు. ప్రస్తుత పరిస్థితుల్లో పాత సచివాలయంలో కోవిడ్ ఆసుపత్రి ఏర్పాటు చేయమని తాము కోరిన విషయాన్ని గుర్తు చేశారు. అలా చేసి ఉంటే 10 వేల మంది రోగులకు అక్కడ వైద్య సౌకర్యాలు కల్పించే అవకాశం ఉండేదని పేర్కొన్నారు. సీఎం తన మొండి వైఖరితో జనాల ప్రాణాలు తీస్తున్నారని మండిపడ్డారు.

Must Read: undefined

ఫాంహౌస్ దగ్గర సచివాలయం కట్టుకోండి: జీవన్ రెడ్డి
సచివాలయాన్ని కేసీఆర్ ఫాంహౌస్ దగ్గర ఔటర్ రింగ్ రోడ్డు మీద కట్టుకోవాలని కాంగ్రెస్ ఎమ్మెల్సీ జీవన్‌రెడ్డి ఎద్దేవా చేశారు. ఊరి వాడికి వారి ఆపద వస్తే... ఊసు గళ్ళ వాడికి దోమల ఆపద అన్నట్టుగా తెలంగాణ ప్రభుత్వ తీరు ఉందని ఎద్దేవా చేశారు. రూ.వెయ్యి కోట్ల విలువ చేసే సచివాలయ భవనాలు కూల్చివేయడం దారుణమని ఆయన అభిప్రాయపడ్డారు.

పాత సచివాలయం కూల్చివేత తెలంగాణ ప్రభుత్వ ఉన్మాద చర్య అని మాజీ మంత్రి నాగం జనార్ధన్ రెడ్డి అభివర్ణించారు. కరోనాతో రాష్ట్రం అల్లకల్లోలం అవుతుంటే రాబోయే 6 నెలల పాటు కూల్చివేత ఆపలేరా అని ప్రశ్నించారు. పాత సచివాలయాన్ని కోవిడ్ కోసం వాడితే ప్రజలకు ఎంతో ఉపయోగంగా ఉండేదని నాగం జనార్ధన్‌రెడ్డి సూచించారు.

Must Read: కరోనాపై సమీక్షకు సీఎస్‌, అధికారులకు గవర్నర్ పిలుపు.. షాకింగ్ సమాధానం