బ్రేకింగ్: వరద సాయం పంపిణీ ఆపేయండి.. ఎన్నికల సంఘం ఆదేశం

హైదరాబాద్‌లో గత నెలలో కురిసిన భారీ వరదల కారణంగా ముంపును ఎదుర్కొన్న బాధితులకు తెలంగాణ ప్రభుత్వం వరదసాయాన్ని ప్రకటించిన సంగతి తెలిసిందే. రూ.10 వేల సాయాన్ని ప్రకటించి పలువురికి అందజేస్తూ వస్తోంది. అయితే, తాజాగా ఈ వరద సాయం నిలిపివేయాలని రాష్ట్ర ఎన్నికల సంఘం ఉత్తర్వులు జారీ చేసింది. జీహెచ్ఎంసీ ఎన్నికల నేపథ్యంలో నోటిఫికేషన్ విడుదల కాగానే అమల్లోకి వచ్చిన మోడల్ కోడ్ ఆఫ్ కండక్ట్‌కు లోబడి నగర పరిధిలో వరదసాయం కోసం దరఖాస్తుల స్వీకరణ, పంపిణీని నిలిపివేయాలని రాష్ట్ర ఎన్నికల కమిషన్ సూచించింది. జీహెచ్ఎంసీ ఎన్నికల ఫలితాలు వెలువడిన తరవాత ఆ పథకాన్ని మామూలుగా కొనసాగించుకోవచ్చని రాష్ట్ర ఎన్నికల సంఘం ఉత్వర్వుల్లో పేర్కొంది. అప్పటి వరకూ మోడల్ కోడ్ ఆఫ్ కండక్ట్ అమల్లోనే ఉంటుందని సూచించింది.

అయితే ఇప్పటికే వరద సహాయం నేపథ్యంలో పెద్ద ఎత్తున ప్రభుత్వం నిధులను విడుదల చేసింది. దాదాపు రూ.500 కోట్ల పైచిలుకు నగదును ఇప్పటికే వరద బాధితులకు అందజేసింది. మరోవైపు హైదరాబాద్ నగరంలో పెద్ద ఎత్తున వరద సహాయం కోసం బాధితులు ఈ సేవ సెంటర్ వద్ద క్యూ కట్టారు. చాలా ప్రాంతాల్లో తొక్కిసలాట కూడా జరిగింది. పరిస్థితి విషమించడంతో పోలీసులు కూడా చేతులెత్తేసారు. చివరకు తోపులాటలు జరిగాయి. పలు ప్రాంతాల్లో కూడా ఉద్రిక్త వాతావరణ నెలకొంది.

వరద సాయంపై పలు రాజకీయ పార్టీల నుంచి అనేక ఫిర్యాదులు అందాయని.. ఇది ఓటర్లను ప్రభావితం చేసే అవకాశం ఉందని ఆయా పార్టీ నేతలు చెప్పడంతో తాము ఈ నిర్ణయం తీసుకున్నట్లు రాష్ట్ర ఎన్నికల సంఘం తెలిపింది.