కొండపోచమ్మ కాల్వకు గండి: తెలంగాణ ENC సంచలన వ్యాఖ్యలు

కొండపోచమ్మ సాగర్ కాలువకు గండి పడడంపై తెలంగాణ ఇంజినీర్ ఇన్ చీఫ్ స్పందించారు. కొత్త కాలువకు ఇలా గండి పడడం అనేది సర్వ సాధారణమ‌ని ఈఎన్‌సీ హరిరాం వివరించారు. కొండపోచమ్మ సాగర్ కాలువ గండి పడటంపై మంగళవారం ఆయన విలేకరుల సమావేశం నిర్వహించారు. కాలువల్లోకి నీటిని విడుదల చేసినప్పుడు ఇలాంటివి జరగడం సహజమ‌ని, తాము అనుకున్న దానికంటే తక్కువే జరిగిందని వ్యాఖ్యానించారు.

కొత్త ప్రాజెక్ట్‌లు నిర్మించినప్పుడు అధికారుల కష్టాన్ని గుర్తించి వారిని ప్రోత్సాహించాలి కానీ.. చిన్న చిన్న ఘటనలను దృష్టిలో పెట్టుకొని ఇంజ‌నీర్లను నిరాశకు గురి చేయొద్దని ఆయన హితవు పలికారు. తాము నాణ్యతతో కూడిన ప్రాజెక్టులు, కాలువలను నిర్మించామ‌ని, గండి ప‌డిన విష‌యంపై మీడియా అనవసరంగా వక్రీకరిస్తుందని ఆయన ఆగ్రహం వ్యక్తం చేశారు.

కాలువకు గండి పడడంపై విపక్షాలు తీవ్రమైన విమర్శలు చేస్తున్న సంగతి తెలిసిందే. తెలంగాణలో లీకేజీల ప్రభుత్వం నడుస్తోందని బీజేపీ రాష్ట్ర అధ్యక్షుడు బండి సంజయ్ కుమార్ విమర్శించారు. నాణ్యత లేని నీటి ప్రాజెక్టులతో ప్రజలు బిక్కుబిక్కుమంటూ గడపాల్సి వస్తోందని ధ్వజమెత్తారు. మంగళవారం ఆయన మీడియాతో మాట్లాడారు. మొన్న కాళేశ్వరం, అంతకు ముందు మధ్య మానేరు, మల్లన్న సాగర్, ఇప్పుడు కొండపోచమ్మకు గండి పడిందని, ఇలా నాణ్యత లేని నిర్మాణాల వల్ల సమీప ప్రాంతాల ప్రజలు క్షణక్షణం బిక్కుబిక్కుమనాల్సిందేనని వ్యాఖ్యానించారు.

కొండపోచమ్మ సాగర్, కాళేశ్వరం సాగునీటి ప్రాజెక్టులో నాణ్యతాలోపాలు రోజుకొకటి బయటపడుతున్నాయని కాంగ్రెస్ ఎంపీ రేవంత్ రెడ్డి విమర్శించారు. సీఎం కేసీఆర్ నియోజకవర్గంలోనే, కేసీఆర్ ఫాంహౌస్‌కు పోయే కాలువ పనుల్లోనే నాణ్యత ఇంత ఘోరంగా ఉంటే ఇక రాష్ట్రంలో జరిగిన కాలువలు, జలాశయాల నాణ్యత ఎలా ఉంటుందో అర్థం చేసుకోవచ్చని అన్నారు. చిన్న కాలువల పరిస్థితి ఇలా ఉంటే ఇక ఎత్తున నిర్మించిన 50 టీఎంసీల మల్లన్న సాగర్, 15 టీఎంసీల కొండపోచమ్మ సాగర్, గందమల పరిస్థితి ఎలా ఉంటుందో అని అనుమానం వ్యక్తం చేశారు.