మెరూన్ పాస్‌బుక్‌లు వద్దు.. సర్కారుకు హైకోర్టు కీలక ఆదేశాలు

దేశంలో ఎక్కడా లేని విధంగా తెలంగాణ రాష్ట్రంలోని వ్యవసాయేతర ఆస్తులకు కూడా ప్రతి వ్యక్తికి పట్టాదారు పాసు పుస్తకాలను ఇవ్వాలని సీఎం కేసీఆర్ నిర్ణయం తీసుకున్నారు. అయితే వ్యవసాయేతర ఆస్తులు కలిగి ఉన్నవారికి మెరూన్ కలర్ పట్టాదారు పాసు పుస్తకాలు జారీ చేస్తామని కెసిఆర్ గతంలో తెలిపారు. అయితే ఈ మెరూన్ కలర్ పాస్ బుక్‌లకు సంబంధించి హైకోర్టు సర్కారుకు కీలక ఆదేశాలు జారీ చేసింది.

రాష్ట్రంలోని గిరిజన (షెడ్యూల్డ్‌) ప్రాంతాల్లో 1/70 చట్టం వచ్చిన తర్వాత చేపట్టిన నిర్మాణాలకు సంబంధించిన యాజమాన్య హక్కును ధృవీకరించేలా మెరూన్‌ పాస్‌బుక్స్‌తోపాటు ఇతర పాస్‌బుక్స్‌ ఏవీ ఇవ్వరాదని హైకోర్టు రాష్ట్ర ప్రభుత్వాన్ని ఆదేశించింది. ఈ మేరకు ప్రధాన న్యాయమూర్తి జస్టిస్‌ ఆర్‌ఎస్‌ చౌహాన్, జస్టిస్‌ బి.విజయసేన్‌ రెడ్డిలతో కూడిన ధర్మాసనం ఇటీవల మధ్యంతర ఉత్తర్వులు జారీచేసింది. మహబూబాబాద్‌ జిల్లాకు చెందిన ఆదివాసీ సంక్షేమ పరిషత్‌ అధ్యక్షుడు పి.శ్రీనివాస్‌తోపాటు మరొకరు దాఖలు చేసిన ప్రజాహిత వ్యాజ్యాన్ని ధర్మాసనం విచారించింది. దీంతో ఈ మేరకు ఉత్తర్వులిచ్చింది.

Read More: GHMC Elections 2020: జిహెచ్ఎంసీ తుది ఓటర్ల జాబితా విడుదల

సుప్రీంకోర్టు తీర్పులకు విరుద్ధంగా గిరిజన ప్రాంతాల్లో 1/70 చట్టం వచ్చిన తర్వాత చేపట్టిన అక్రమ నిర్మాణాలను క్రమబద్ధీకరించేలా ప్రభుత్వం మెరూన్‌ పాస్‌బుక్స్‌ మంజూరు చేస్తోందని పిటిషనర్ల తరఫు న్యాయవాది పీవీ రమణ నివేదించారు. ఈ మేరకు ప్రభుత్వం జారీచేసిన ఉత్తర్వులను చట్టవిరుద్ధంగా ప్రకటించాలని కోరారు. ఈ వ్యవహారంపై పూర్తి వివరాలతో కౌంటర్‌ దాఖలు చేస్తామని, గడువు ఇవ్వాలని అడ్వకేట్‌ జనరల్‌ బీఎస్‌ ప్రసాద్‌ అభ్యర్థించగా, తదుపరి విచారణను ధర్మాసనం ఈ నెల 19కి వాయిదా వేసింది.