TSPSC: పేపర్ లీకేజీపై గవర్నర్ సీరియస్.. 48 గంటల్లో నివేదిక ఇవ్వాలని ఆదేశం

తెలంగాణ స్టేట్ పబ్లిక్ సర్వీస్ కమిషన్ (టీఎస్‌పీఎస్సీ) గ్రూప్ 1 ప్రశ్నపత్రం లీకేజీ ఘటనపై రాష్ట్ర గవర్నర్‌ సౌందరరాజన్ తమిళిసై సీరియస్‌గా స్పందించారు. ప్రశ్నప్రతం లీకేజీ వ్యవహారంపై 48 గంటల్లో నివేదిక ఇవ్వాలని టీఎస్‌పీఎస్సీని గవర్నర్ ఆదేశించారు. ప్రశ్నపత్రం లీకేజీని తీవ్రంగా పరిగిణించిన గవర్నర్‌ తమిళసై.. ఈ ఘటనపై సమగ్ర విచారణ జరిపి నివేదిక ఇవ్వాలన్నారు. అలాగే, ఇలాంటి ఘటనలు మళ్లీ జరగకుండా చర్యలు కూడా ప్రతిపాదించాలని సూచించారు.

కాగా, టీఎస్‌పీఎస్సీ పేపర్‌ లీకేజీ వ్యవహారంలో ఇప్పటికే 9 మంది నిందితులను బేగంబజార్‌ పోలీసులు అరెస్టు చేశారు. నిందితులను నాంపల్లి కోర్టులో హాజరుపర్చగా.. విచారించిన న్యాయమూర్తి 9 మంది నిందితులకు 14 రోజుల రిమాండ్‌ విధించారు. అనంతరం నిందితులను పోలీసులు చంచల్‌గూడ జైలుకు తరలించారు.

మరో వైపు టీఎస్‌పీఎస్సీ పేపర్‌ లీకేజీ కేసును సిట్‌కు బదిలీ చేస్తూ హైదరాబాద్‌ నగర కమిషనర్ సీవీ ఆనంద్‌ ఉత్తర్వులు జారీ చేశారు. అదనపు సీపీ ఏఆర్‌ శ్రీనివాస్‌ ఆధ్వర్యంలో ఈ దర్యాప్తు కొనసాగుతుందని ఉత్తర్వుల్లో పేర్కొన్నారు.