సాదాబైనామాల క్రమబద్ధీకరణకు ఆర్డినెన్స్.. కేసీఆర్ కీలక ఆదేశాలు

సాదాబైనామాల క్రమబద్ధీకరణ ప్రక్రియను ఆపాలని హైకోర్టు బుధవారం ప్రభుత్వాన్ని ఆదేశించింది. ఈ నేపథ్యంలో ఆర్డినెన్స్‌ తీసుకొచ్చి సాదాబైనామాలను క్రమబద్ధీకరించాలని సర్కారు భావిస్తోంది. దీంతో శుక్రవారం జరిగిన కేబినెట్ భేటీలో కీలక నిర్ణయం తీసుకున్నారు. సాదాబైనామాల క్రమబద్ధీకరణ కోసం ఆర్డినెన్స్‌ జారీకి మంత్రిమండలి ఆమోదం తెలిపింది. ధరణి వెబ్‌పోర్టల్‌ ద్వారా త్వరలో వ్యవసాయేతర ఆస్తుల నమోదుకు అనుమతులను ప్రారంభించాలని నిర్ణయించింది. సీఎం కేసీఆర్‌ అధ్యక్షతన శుక్రవారం మంత్రివర్గ సమావేశం జరిగింది. కేబినెట్‌ నిర్ణయాలపై నేరుగా ఉత్తర్వులు జారీ చేయాలని ప్రభుత్వం నిర్ణయించింది.

ఈ భేటీలో ధరణి పోర్టల్‌లో వ్యవసాయేతర ఆస్తుల నమోదు గురించి చర్చించారు. ఇప్పటికే వ్యవసాయ భూముల నమోదు జరుగుతోంది. రాష్ట్రవ్యాప్తంగా వ్యవసాయేతర ఆస్తుల నమోదు మూడు నెలల క్రితమే మొదలైంది. నగరాలు, పట్టణాలు, గ్రామాల్లో ఇళ్ల యజమానుల నుంచి అధికారులు సమాచారం తీసుకొని అప్‌లోడ్‌ చేశారు. ఈ ఆస్తుల నమోదుకు అనుమతులివ్వాలని, పాస్‌పుస్తకాలు సైతం జారీ చేయాలని నిర్ణయించినట్లు తెలిసింది.

Read more: తెలంగాణలో పలువురు ఐఏఎస్‌ల బదిలీలు

కొత్త భూరికార్డుల హక్కుల (ఆర్వోఆర్‌) చట్టంలో సాదాబైనామాల క్రమబద్ధీకరణకు అవకాశం లేకపోవడంతో 1971 ఆర్వోఆర్‌ చట్టంలోని క్లాజ్‌లను చేరుస్తూ ఆర్డినెన్స్‌ జారీకి రాష్ట్రమంత్రిమండలి ఆమోదం తెలిపింది. అక్టోబరు 12న సాదాబైనామాల క్రమబద్ధీకరణకు ఉత్తర్వులు జారీ కాగా ఇప్పటి వరకు 9 లక్షలకు పైగా దరఖాస్తులు వచ్చాయని సీఎం వెల్లడించారు. మొత్తం మీద సాదాబైనామాల క్రమబద్ధీకరణకు వీలుగా ఆర్డినెన్స్ తీసుకురావాలని ప్రభుత్వం భావిస్తోంది. అందుకే గవర్నర్‌ తమిళిసై శుక్రవారం నుంచి శాసనసభ, మండలి సమావేశాలను ప్రొరోగ్‌ చేస్తున్నట్లు ప్రకటించారు. ఈ నిర్ణయం వెనుక ప్రధాన ఉద్దేశం సాదాబైనామాల ఆర్డినెన్సేనని సమాచారం.