తెలంగాణలో దసరా సెలవులు 24, 25 తేదీల్లోనే..

తెలంగాణలో దసరా ఉత్సవాలు ప్రారంభమైపోయాయి. కరోనా వైరస్ కారణంగా విధించిన లాక్ డౌన్ వల్ల ప్రజలంతా ఇళ్లలోనే ఉండటంతో గ్రామాల్లో సందడి వాతావరణం నెలకొంది. అయితే అన్ లాక్ 5.0లో భాగంగా రాష్ట్రవ్యాప్తంగా కార్యకలాపాలన్నీ ప్రారంభమైపోయాయి. ఉద్యోగులు యథావిధిగా డ్యూటీలకు వెళ్తున్నారు. జనజీవనం కూడా దాదాపు సాధారణ స్థితికి వచ్చేసింది.

దాదాపు ఏడు నెలలుగా అందరూ ఇళ్లకే పరిమితం కావడంతో ఎవరికీ సెలవులతో పెద్దగా పని పడలేదు. అన్ని రోజులనూ ఒకేలా ఎంజాయ్ చేశారు. అయితే ఆఫీసులు ప్రారంభం కావడం, ఇతర కార్యకలాపాలు పుంజుకోవడంతో జనాలకు సెలవుల గురించి ఆలోచించడం మొదలు పెట్టారు. ఈ తరుణంలో దసరా పండుగ విషయంలో గందరగోళం నెలకొనడం.. సెలవు దినంపై వివిధ వార్తలు షికార్లు చేశాయి.

వాస్తవానికి 2019లోనే ఈ ఏడాది దసరా అక్టోబర్ 25వ తేదీ అని ప్రభుత్వం అధికారికంగా ప్రకటించేసింది. అయితే తిధి, పంచాంగం ప్రకారం ఈ ఏడాది దసరా అక్టోబర్ 26వ తేదీ అని పలు దేవస్థానాలు ప్రకటించడంతో పండుగ విషయంలో కాస్త గందరగోళం నెలకొంది. తిథి, పంచాంగం ప్రకారం దసరా అక్టోబరు 26న ఉన్నందున సెలవలు కూడా 25, 26 తేదీల్లో ప్రకటించాలని ఇప్పటికే సీఎస్ సోమేష్ కుమార్‌కు వినతులు వచ్చాయి. బ్యాంకు ఉద్యోగులు పండుగ జరుపుకొనేందుకు వీలుగా 25, 26 తేదీలు అంటే ఆది, సోమవారాల్లో సెలవులు ప్రకటించాలని ఏపీటీబీఈఎఫ్ జనరల్ సెక్రటరీ బీఎస్ రాంబాబు తెలంగాణ సీఎస్‌కు లేఖ రాశారు.