ఉద్యోగులకు గుడ్ న్యూస్.. సీఎం కీలక హామీ.. ఎన్నికల కోడ్ ముగియగానే ప్రకటన

తెలంగాణ ప్రభుత్వ ఉద్యోగులకు సీఎం కేసీఆర్ గుడ్ న్యూస్ చెప్పారు. బీఆర్కే భవన్‌లో తనను కలిసిన ఉద్యోగ సంఘాల నేతలకు కేసీఆర్ కీలక హామీ ఇచ్చారు. ఎన్నికల కోడ్ ముగిసిన వెంటనే పీఆర్సీ ప్రకటన ఉంటుందని కేసీఆర్ హామీ ఇచ్చినట్లు ఉద్యోగ సంఘ నేతలు తెలిపారు. ఏపీలో జగన్ సర్కారు 27 శాతం పీఆర్సీ ఇచ్చిందని చెప్పగా.. అంతకంటే ఎక్కువే ఇస్తామని కేసీఆర్ భరోసా ఇచ్చారని ఉద్యోగ సంఘ నేతలు చెప్పారు.

ఉద్యోగులకు 7.5 శాతం పీఆర్సీ ఇస్తారని గతంలో వార్తలు వెలువడ్డాయి. దీంతో ఉద్యోగులు ఆందోళన చెందారు. 2018 జులై నుంచి పీఆర్సీ అమలు కావాల్సి ఉందని ఉద్యోగ సంఘాల నేతలు ప్రభుత్వం దృష్టికి తీసుకొచ్చారు. ఈ విషయమై స్పందించిన సీఎం.. తమ ప్రభుత్వం ఉద్యోగులకు అన్యాయం చేయబోదన్నారు. ఉద్యోగుల పదవీ విరమణ పెంపు విషయంలో సీఎం హామీ ఇచ్చారని ఉద్యోగ సంఘ నేతలు తెలిపారు.

ఎన్నికల నోటిఫికేషన్ అమల్లో ఉండటంతోనే సీఎం ప్రకటన చేయడం లేదని.. కానీ రాష్ట్రంలోని ఉద్యోగులు ఆందోళనలో ఉండటంతో తాము ఈ విషయాలను వెల్లడిస్తున్నామని సీఎంతో సమావేశం అనంతరం ఉద్యోగ సంఘాల నేతలు తెలిపారు.