తెలంగాణలో ఆగస్టు 31 వరకు లాక్‌డౌన్.. అనుమతించేవి ఇవే

తెలంగాణలో లాక్‌డౌన్‌ను ఆగస్టు 31 వరకు పొడిగించారు. కేంద్ర హోం శాఖ ఇటీవల విడుదల చేసిన అన్‌లాక్ 3.0 మార్గదర్శకాల ప్రకారం శుక్రవారం (జులై 31) రాత్రి తెలంగాణ ప్రభుత్వం తదుపరి ఉత్తర్వులు జారీ చేసింది. రాత్రి పూట కర్ఫ్యూను ఎత్తివేస్తున్నట్లు ప్రకటించారు. ఇకపై అంతర్రాష్ట్ర ప్రయాణాలు, తెలంగాణ నుంచి ఇతర రాష్ట్రాలకు ప్రయాణాలకు సంబంధించి ఎలాంటి ఆంక్షలు ఉండవని స్పష్టం చేశారు. కంటెయిన్‌మెంట్ జోన్లలో లాక్‌డౌన్ కొనసాగుతుందని పేర్కొన్నారు. ఈ మేరకు సీఎస్ సోమేశ్ కుమార్ శుక్రవారం రాత్రి అన్ని జిల్లాల కలెక్టర్లకు ఆదేశాలు జారీ చేశారు.

స్కూళ్లు, కాలేజీలు, కోచింగ్‌ సెంటర్లపై ఆగస్టు 31 వరకు ఆంక్షలు కొనసాగుతాయని పేర్కొన్నారు. సినిమా హాళ్లు, స్విమ్మింగ్‌ పూల్స్, బార్స్‌, మెట్రో రైలు‌ సేవలపైనా ఆంక్షలు కొనసాగుతాయని.. కేంద్ర ప్రభుత్వ మార్గదర్శకాలకు అనుగుణంగా వీటి ప్రారంభించే అంశంపై నిర్ణయం తీసుకుంటామని వెల్లడించారు.

కంటైన్‌మెంట్‌ జోన్లలో అంక్షలు కొనసాగుతాయని స్పష్టం చేశారు. కేంద్ర ప్రభుత్వ మార్గదర్శకాలకు అనుగుణంగా ఆగస్టు 5 నుంచి జిమ్‌లు, యోగా సెంటర్లకు అనుమతించనున్నట్లు ఉత్తర్వుల్లో పేర్కొన్నారు. రాజకీయ, క్రీడా, సామాజిక, సాంస్కృతిక సభలు, సమావేశాలను అనుమతించబోమని స్పష్టం చేశారు.

వివాహాది శుభ కార్యక్రమాలను ఇంతకు ముందు మాదిరిగానే 50 మంది ఆహ్వానితులతో కొవిడ్ నిబంధనలు పాటిస్తూ నిర్వహించుకోవచ్చునని తెలిపారు. అంత్యక్రియల్లో 20 మంది వరకు పాల్గొనవచ్చని వెల్లడించారు. రాష్ట్రాల మధ్య ప్రయాణాలపై ఆంక్షలు ఎత్తివేయడంతో ఏపీ, తెలంగాణ మధ్య రాకపోకలు సాగించే వారికి గొప్ప ఊరట కలిగినట్లయింది.

తెలంగాణ ప్రభుత్వ మార్గదర్శకాలు:
✧ ఆగస్టు 1 నుంచి రాత్రి పూట కర్ఫ్యూ ఎత్తివేత
✧ ఆగస్టు 5 నుంచి జిమ్‌లు, యోగా సెంటర్లకు అనుమతి
✧ స్కూళ్లు, కాలేజీలు, కోచింగ్‌ సెంటర్లు ఆగస్టు 31 వరకు మూసివేత
✧ సినిమా హాళ్లు, స్విమ్మింగ్‌ పూల్స్, బార్స్‌, మెట్రో రైలు‌ మూసివేత కొనసాగింపు (కేంద్ర హోంశాఖ మార్గదర్శకాల ప్రకారం పరిస్థితులకు అనుగుణంగా వీటి ప్రారంభంపై నిర్ణయం)
✧ కంటైన్‌మెంట్‌ జోన్లలో అంక్షలు కొనసాగింపు
✧ రాజకీయ, క్రీడా, సామాజిక, సాంస్కృతిక సభలు, సమావేశాలకు అనుమతి లేదు

Also Read: శానిటైజర్‌తో జరభద్రం.. ఎంత ప్రమాదకరమో చూడండి

Must Read: పిల్లల ‘టీవీ’ పాఠాల కోసం తాళి తాకట్టు పెట్టిన తల్లి