డ్రోన్ కేసు: ఎంపీ రేవంత్ రెడ్డికి హైకోర్టులో ఊరట

డ్రోన్ ఎగరవేత కేసులో కాంగ్రెస్ ఎంపీ రేవంత్ రెడ్డికి ఎట్టకేలకు బెయిల్ మంజూరైంది. ఈ మేరకు బుధవారం తెలంగాణ హైకోర్టు న్యాయమూర్తి రేవంత్ రెడ్డికి షరతులతో కూడిన బెయిల్ మంజూరు చేశారు. రూ.10 వేల చొప్పున ఇద్దరి పూచీకత్తులు సమర్పించాలని న్యాయమూర్తి ఆదేశించారు. కేసు విచారణలో పోలీసులకు సహకరించాలని కూడా ఆదేశించారు. అయితే, తనపై నమోదైన ఈ కేసుకు సంబంధించిన ఎఫ్ఐఆర్‌ను కొట్టేయాలన్న మరో పిటిషన్‌ను మాత్రం కోర్టు 4 వారాలకు వాయిదా వేసింది. ఈ పిటిషన్‌పై కౌంటర్ దాఖలు చేయాలని కోర్టు పోలీసులను ఆదేశించింది. గత 14 రోజులుగా రేవంత్ రెడ్డి చర్లపల్లి జైలులోనే ఉన్న సంగతి తెలిసిందే. తొలుత బెయిల్ కోసం దాఖలు చేసిన పిటిషన్‌ను కూకట్‌పల్లి కోర్టు కొట్టివేసింది. దీంతో రేవంత్ రెడ్డి హైకోర్టును ఆశ్రయించారు.

Must Read: తెలంగాణలో 5 కరోనా కేసులు.. ఆ విమానాలన్నీ రద్దు: మంత్రి ఈటల

కొద్ది రోజుల క్రితం హైదరాబాద్ శివారులోని కేటీఆర్ ఫాంహౌజ్‌పైన డ్రోన్ ఎగరేసి చిత్రీకరించిన ఆరోపణలపై ఎంపీ రేవంత్ రెడ్డి అరెస్టయ్యారు. ఎలాంటి అనుమతులు లేకుండా డ్రోన్లు ఎగరేసి కెమెరాతో చిత్రీకరించడం నేరమని రేవంత్ రెడ్డిని నార్సింగి పోలీసులు అరెస్టు చేశారు. జీవో నెం. 111ను ఉల్లంఘించి మంత్రి కేటీఆర్ ఫాంహౌజ్ నిర్మించుకున్నారని రేవంత్ రెడ్డి ఆరోపిస్తున్నారు. ఆ విషయాన్ని నిరూపించేందుకు తాను డ్రోన్ ఎగరేసినట్లు చెప్పారు.

Also Read: మహిళకు కుడివైపున గుండె.. ఆశ్చర్యపోయిన వైద్యులు

అయితే, రేవంత్ వ్యక్తిగత ప్రయోజనాల కోసమే ఇలా వ్యవహరిస్తున్నారని టీఆర్ఎస్ నేతలు ఆరోపించారు. గోపన్ పల్లి వ్యవహారంలో రేవంత్ రెడ్డిని ఇరుక్కున్నందుకు, ప్రతిచర్యగా ఆయన జీవో 111 అంశాన్ని తెరపైకి తెచ్చారని విమర్శిస్తున్నారు. కేటీఆర్ ఫాంహౌజ్ నిర్మాణంలో ఎలాంటి అవకతవకలు జరగలేదని వారు చెబుతున్నారు.

Must Read: 7వ నెలలోనే బలవంతపు డెలివరీ.. పుట్టింది మగా, ఆడా తెలియని గాంధీ సిబ్బంది!